Read new_tumbuka_bible MaSalimo 25 Bible Online

MaSalimo 25 - new_tumbuka_bible bible

MaSalimo 25

¹Salimo la Davide. Kwa imwe, Mwe FUMU, ndiko nkhwinuskira mzimu wane.

²Mwa imwe, mwe Chiuta wane, ndiko ine nkhugomezga, mungazomeranga chara kuti ndilengeskeke, ŵarwani ŵane ŵareke kundigiyira.

³Inya, ŵareke kulengeskeka awo ŵakugomezga mwa imwe, kweni ŵalengeskeke awo ŵakuchita uryarya.

⁴Mwe FUMU, mundirongore nthowa zinu, mundisambizge kwenda mu nthowa zinu.

⁵Mundirongozge mu unenesko winu na kundisambizga, pakuti imwe ndimwe Chiuta, Muponoski wane, ine nkhugomezga imwe nyengo zose.

⁶Mwe FUMU, kumbukani lusungu lwinu, kumbukani chisungusungu chinu, pakuti vyeneivi ndivyo mukavirongora kufuma papo kale.

⁷Mureke kukumbuka zakwananga, nanga ghangaŵa majuvyo gha ku uwukirano wane. Kweni mundikumbuke, Mwe FUMU, kwakuyana na chisungusungu chinu, ndiposo na uweme winu.

⁸FUMU njiweme na yakunyoroka, ndicho chifukwa yikusambizga ŵakwananga, nthowa zakhe.

⁹Yikuŵarongozga ŵakuzika mu icho nchakunyoroka, na kuŵasambizga nthowa zakhe.

¹⁰Nthowa zose za FUMU, ndi za chisungusungu na za magomezgeko, kwa awo ŵakusunga phangano lakhe, na vilayizgo vyakhe.

¹¹Chifukwa cha kuzirwa kwa zina linu, Mwe FUMU, mundigowokere uheni wane, pakuti ngukuru nadi.

¹²Kasi ndi njani uyo wakopa FUMU? Ŵa ntheura ndiyo FUMU yiti yimusambizge nthowa, yeneiyo wakwenera kwendamo.

¹³Munthu uyu wati wakharenge makora, ŵana ŵakhe ŵati ŵahare charu.

¹⁴FUMU yikuchita ubwezi na awo ŵakopa iyo, ndipo yikuŵamanyiska phangano lakhe.

¹⁵Maso ghane ghakulaŵiska kwa FUMU nyengo yose, ndiyo yiti yisutule malundi ghane mu ukonde.

¹⁶Mundilaŵiske ine na kundilengera lusungu, chifukwa ndili ndekha ndiposo nkhusuzgika.

¹⁷Wuskanimo kukwenyerera kwa mu mtima wane, mundifumyemo mu visuzgo vyane.

¹⁸Wonani umo nkhukomwera na visuzgo vyane, mundigowokere zakwananga zane.

¹⁹Wonani umo ŵarwani ŵane ŵaliri ŵanandi, umo ŵakunditinkhira ine na nkhaza.

²⁰Ndivikirirani ndipo muthaske umoyo wane, mungazomerezga kuti ndilengeskeke, pakuti nkhubisama mwa imwe.

²¹Uweme na urunji vindisungilire, chifukwa nkhugomezga mwa imwe.

²²Mwe Chiuta, ŵawombolani ŵaIsraele, kufuma visuzgo vyawo vyose.