Read new_tumbuka_bible MaSalimo 27 Bible Online

MaSalimo 27 - new_tumbuka_bible bible

MaSalimo 27

¹Salimo la Davide. FUMU ndiyo ungweru na chiponosko chane, kasi ndopenge njani? FUMU ndiyo linga la umoyo wane, ndi njani uyo ndiŵenge nayo na wofi?

²Para ŵaheni ŵakusenderera kundiwukira, mwakuti ŵandikome ine, para ŵarwani na ŵavimphindikwa ŵane ŵakwimikana nane, iwo ndiwo ŵati ŵakhuŵare na kuwa.

³Nanga ndi mpingo wa nkhondo undizingirizge, mtima wane kuti wopenge chara. Nanga nkhondo yiŵeko kulimbana nane, ine nditi ndiŵenge wakugomezga ndipera.

⁴Chinthu chimoza pera nkhuromba kwa FUMU, cheneichi ndicho nditi ndipenjenge, chakuti ndikharenge mu Nyumba ya FUMU, mazuŵa ghose gha umoyo wane. Nditi ndidaŵirenge uweme wa FUMU, na kupenja iyo mu nyumba yakhe.

⁵Pakuti mu mazuŵa gha visuzgo, iyo wati wandisunge mu nyumba yakhe. Yizamkundibisa mu mufwiri wa hema lakhe, na kundiŵika pa jarawe pachanya.

⁶Ndipo mutu wane uti ukwezgekenge pachanya pa ŵarwani ŵane awo ŵandizingirizga kwete. Ndizamkupereka sembe mu Chihema chakhe, uku nkhuchemerezga mwakukondwa, nditi ndimbe sumu za kurumba FUMU.

⁷Mundipulike, Mwe FUMU para ine nkhuchemerezga kwa imwe, mundilengere lusungu na kundizgora.

⁸Imwe mukuyowoya kuti, “Mundipenjenge ine.” Mtima wane ukuti kwa imwe, “Mwe FUMU ndimwe ndipenjenge.”

⁹Mureke kubisa chisko chinu kwa ine chara. Mureke kuchimbizga muteŵeti winu mu ukari, imwe ndimwe mwandovwiranga. Mureke kunditaya, nesi kundisida, Mwe Chiuta, Muponoski wane.

¹⁰Nanga ŵadada na amama ŵandiside, imwe FUMU mundipokererenge.

¹¹Mwe FUMU, ndisambizgani nthowa zinu, mundirongozge mu nthowa yiweme, chifukwa ndili na ŵarwani.

¹²Mureke kundipereka mu mawoko gha ŵarwani ŵane, pakuti ŵakaboni ŵa utesi ŵandiwukira, ndipo ŵakuyowoya vinthu vya nkhaza pera.

¹³Nkhugomezga kuti nditi ndiwone uweme wa FUMU, mu charu cha ŵamoyo.

¹⁴Gomezga mwa FUMU, uŵe na chikanga na wakukhwima mu mtima, nadi, gomezga mwa FUMU.