Read new_tumbuka_bible MaSalimo 29 Bible Online

MaSalimo 29 - new_tumbuka_bible bible

MaSalimo 29

¹Salimo la Davide. Rumbani FUMU, imwe mukukhara kuchanya, rumbani uchindami na nkhongono zakhe.

²Rumbani uchindami wa FUMU, uwo ukwenerera zina lakhe, yilambirani FUMU mu utozi wa utuŵa wakhe.

³Lizgu la FUMU likupulikikwa pachanya pa maji, Chiuta wa uchindami wakududumira, lizgu la FUMU lapulikikwa pa nyanja yikuru.

⁴Lizgu la FUMU nda nkhongono, lizgu la FUMU ndakuzura na ufumunkhuru.

⁵Lizgu la FUMU likuŵarura makuni gha milanje, FUMU yikuŵarura milanje ya ku Lebanoni.

⁶Yikuzgora nkhorongo ya Lebanoni, kudukaduka nga ndi mwana wa ng'ombe, Phiri la Siriyoni[1] kudukaduka nga ndi mwana wa njati.

⁷Lizgu la FUMU likuzgora madimi gha moto kumwetuka.

⁸Lizgu la FUMU likusunkhunya mapopa, nadi, FUMU yikusunkhunya mapopa gha Kadeshi.

⁹Lizgu la FUMU likusunkhunyiska makuni gha misoro, likuyoyoska mahamba gha makuni mu thengere. Wose ŵa mu nyumba yakhe ŵakuchemerezga ŵakuti, “Uchindami uwo!”

¹⁰FUMU yikukhara pa chizumbe pachanya pa chigumura, nadi, FUMU yikuwusa nga ndi karonga kwa muyirayira.

¹¹FUMU yikupereka nkhongono ku ŵanthu ŵakhe, FUMU yikutumbika ŵanthu ŵakhe pakuŵapa mutende!