Read new_tumbuka_bible MaSalimo 30 Bible Online

MaSalimo 30 - new_tumbuka_bible bible

MaSalimo 30

¹Sumu yakuwonga pakupatuliska Nyumba ya Chiuta. Salimo la Davide. Ine nditi ndimuchindikani imwe, Mwe FUMU, chifukwa mwandiponoska, mundazomerezge kuti ŵarwani ŵane ŵasekerere.

²Mwe FUMU, Chiuta wane, nkhalirira kwa imwe kuti mundovwire, ndipo imwe mukandichizga.

³Mwe FUMU, mwandifumya ku malo gha ŵakufwa, mwawezgeraso umoyo wane kuti ndireke kuruta ku dindi.

⁴Yimbani sumu zakurumba FUMU, imwe mwa ŵanthu ŵakhe ŵakupatulika, wongani zina lakhe lituŵa.

⁵Pakuti ukari wakhe ngwa kanyengo kachoko waka, kweni kutemwa kwakhe nkhwa muyirayira swii. Kulira masozi kungachezera usiku, kweni chimwemwe chikwiza na mulenje.

⁶Apo ine vinthu vikandiŵira makora, nkhati, “Ine kuti nditi ndisukuniskikenge chara.”

⁷Mwe FUMU, mwandikhazika nga ndi phiri lakukhora, chifukwa cha kutemwa kwinu. Kweni apo mukabisa chisko chinu, ine nkhatenthema.

⁸Nkhalirira kwa imwe, Mwe FUMU, ndipo nkhaŵeyerera kwa imwe nkhati,

⁹“Kasi mu nyifwa yane muli chandulo uli, usange nkhukhilira ku dindi? Kasi para ndazgoka fuvu, ndingamanya kumuchindikani? Kasi fuvu lingapharazga kuti ndimwe ŵamagomezgeko?”

¹⁰Pulikani, Mwe FUMU, na kundilengera lusungu, Mwe FUMU, muŵe movwiri wane.

¹¹Mwazgora kutengera kwane kuŵa kuvina, mwandivura vyakuvwara vyane vya chitima, mwandivwarika na chimwemwe.

¹²Ntheura ndikharenge waka chete chara, kweni ndimuchindikaninge na mtima wose. Mwe FUMU, Chiuta wane, ndizamkumuwongani kwa muyirayira.