Read new_tumbuka_bible MaSalimo 31 Bible Online

MaSalimo 31 - new_tumbuka_bible bible

MaSalimo 31

¹Kwa uyo wakwimbiska sumu. Salimo la Davide. Mwe FUMU, mwa imwe, ndimo nkhutamira muyirayira. Mungazomerezga chara kuti ine ndilengeskeke. Mu urunji winu mundithaske.

²Tegherezgani khutu linu kwa ine, yendeskani kwiza kandithaska. Muŵe jarawe lane lakubisamamo, linga lakukhora la kundiponoska ine.

³Nadi, imwe ndimwe jarawe lane na linga lane, Mundirongozge na kundidangirira, chifukwa cha zina linu.

⁴Mundiwonjore mu ukonde uwo ŵandithyera, pakuti imwe ndimwe linga lane.

⁵Nkhupereka mzimu wane mu mawoko ghinu, ndiwombolani, Mwe FUMU, Chiuta wakugomezgeka.

⁶Imwe mukutinkha awo ŵakusopa vikozgo vya waka, kweni ine nkhugomezga imwe FUMU.

⁷Ine nditi ndikondwe na kusekerera, chifukwa cha chisungusungu chinu. Pakuti imwe mwawona visuzgo vyane, ndipo mwapanikizga maunonono ghane.

⁸Imwe kuti muli kundipereka ku ŵarwani ŵane chara, kweni mwandiŵika pa malo ghasani.

⁹Mundilengere lusungu, Mwe FUMU, chifukwa ndili mu suzgo, Maso ghane ghakulolotera waka chifukwa cha chitima mzimu pamoza na thupi lane vyaropwa.

¹⁰Pakuti umoyo wane ukumara na chitima, virimika vyane na kutampha. Nkhongono zane zikuropwa chifukwa cha kwananga, ndipo viwangwa vyane navyo vyasoghoyeka.

¹¹Ŵarwani ŵane wose ŵakundihoya, ŵazengezgani ŵane nawo nkhuŵaseruska. Ŵabwezi ŵane nawo ŵakuti ndili wakofya, awo ŵakundiwona mu msewu ŵakundichimbira.

¹²Ŵanthu ŵandiruwa nga ndi munthu wakufwa, ndili nga ndi chiyaŵiro chakusweka.

¹³Nadi, nkhupulika ŵanandi ŵakutokotoskerana, ndipo vinthu vyakofya vyandizingirizga kosekose. Iwo ŵakupangana kuti ŵimikane nane, ndipo ŵakunozgera kuti ŵandikome.

¹⁴Kweni ine nkhugomezga imwe, Mwe FUMU, Ine nkhuti, “Imwe ndimwe Chiuta wane.”

¹⁵Mazuŵa ghane ghali mu mawoko ghinu, ndithaskani ku ŵarwani ŵane, na ku awo ŵakundizikizga.

¹⁶Zomerezgani kuti chisko chiŵare pa muteŵeti winu, mundithaske mu chisungusungu chinu.

¹⁷Mwe FUMU, mungazomeranga chara kuti ndikhozgeke soni, pakuti nkhuromba kwa imwe. Kweni ŵaheni ndiwo ŵakhozgeke soni, rekani iwo ŵarute chete ku malo gha ŵakufwa.

¹⁸Muŵachetamiske ŵanthu ŵatesi, pakuti ŵakuyowoya mwakwerura ŵarunji, mwakujikuzga na mwakuyuyura.

¹⁹Nawo mbukuru wa uweme winu, uwo mwasungira awo ŵakumopani, ndipo mwaŵachitira awo ŵakubisama mwa imwe, panthazi pa ŵanthu.

²⁰Mukuŵabisa pa malo apo pali imwe, kuti muŵavikirire ku chiŵembu cha ŵanthu ŵaheni. Mukuŵasunga makora kusi ku hema linu, kuti ŵareke kutukika na ŵarwani ŵawo.

²¹Yirumbike FUMU, pakuti mwakuzizwiska, yarongora chisungusungu chakhe kwa ine, pa nyengo iyo nkhazingirizgikira mu msumba na ŵarwani.

²²Mu kuchiruskika kwane, nkhayowoya kuti, “Ndachimbizgikira kutali kufuma pa maso pinu.” Kweni imwe mukapulika kuŵeya kwane, para nkharomba wovwiri winu.

²³Temwani FUMU, mose mwa ŵakupatulika ŵakhe. FUMU yikusungilira awo mbakugomezgeka, kweni yikuŵalanga chomene awo mbakujikuzga.

²⁴Muŵe ŵankhongono ndipo mukhwime mtima, mose imwe mukugomezga mwa FUMU.