Read new_tumbuka_bible MaSalimo 33 Bible Online

MaSalimo 33 - new_tumbuka_bible bible

MaSalimo 33

¹Sekererani mwa FUMU, imwe mwa ŵanthu ŵarunji, nchakwenerera nadi kuti ŵarunji ŵayirumbenge.

²Rumbani FUMU pakulizga bango, mukoŵerane pa kwimba sumu, na chiding'indi cha malusinga khumi.

³Muyiyimbire sumu yiphya, lizgani malusinga na lwana, na kupoma na chimwemwe.

⁴Pakuti mazgu gha FUMU ngakunyoroka, ndipo milimo yakhe yose yikuchitika mwakugomezgeka.

⁵Yikutemwa urunji na weruzgi wakunyoroka, charu ndi chakuzura na chisungusungu cha FUMU.

⁶Na mazgu gha FUMU, vya kuchanya vikalengeka, mawumba ghose gha kuchanya, ghakalengeka na muvuchi wakhe.

⁷Yikawunjika maji gha nyanja nga ndi mu chiŵiya, yikajalira zindimba nga ndi mu zinthamba.

⁸Charu chose cha pasi chope FUMU, ŵanthu wose ŵa pa charu cha pasi ŵachindike iyo.

⁹Pakuti yikayowoya, ndipo vikachitika nadi, yikalangula, ndipo vikawoneka nadi.

¹⁰FUMU yikuzgora fundo za ŵamitundu kuŵa zawakawaka, yikutimbanizga ivyo ŵanthu ŵanozgera.

¹¹Kweni fundo za FUMU zikukhalirira kwa muyirayira, maghanoghano gha mu mtima wakhe, ghakukhalirira ku miwiro yose.

¹²Ndakutumbikika fuko ilo Chiuta wakhe ndi FUMU, ŵanthu awo yaŵasankha kuŵa ŵakhe na ŵakhe.

¹³Kufuma kuchanya, FUMU yikulaŵiska pasi, ndipo yikuwona ŵanthu wose.

¹⁴Kwenekuko yikukhara pa chizumbe chakhe yikulaŵiska pa ŵanthu wose, awo ŵakukhara pa charu cha pasi.

¹⁵Iyo ndiyo wakalenga mitima ya ŵanthu wose, ndiyo wakuwona milimo yawo yose.

¹⁶Karonga wakuthaskika na unandi wa ŵasilikari chara, chinkhara chikuthaskika na nkhongono zakhe zinandi chara.

¹⁷Hachi la nkhondo ungaligomezga chara, kuti wakukupe kutonda, na nkhongono zakhe zikuru kuti wangathaska munthu chara.

¹⁸Maso gha FUMU ghakuŵa pa awo ŵakopa iyo, ŵeneawo ŵakugomezga mu chisungusungu chakhe.

¹⁹Yikuchita ivi kuti yiŵathaske ku nyifwa, na kuŵasungilira na umoyo para kuli njara.

²⁰Mitima yithu yikulindirira FUMU, chifukwa ndiyo movwiri withu na nguru yithu.

²¹Nadi, mitima yithu yikukondwa mwa iyo, chifukwa tikugomezga mu zina lakhe lituŵa.

²²Chisungusungu chinu chiŵenge pa ise, Mwe FUMU, nga ndi umo tikugomezgera mwa imwe.