Read new_tumbuka_bible MaSalimo 34 Bible Online

MaSalimo 34 - new_tumbuka_bible bible

MaSalimo 34

¹Salimo la Davide, para wakajiyerezgera kuŵa wakufuntha panthazi pa Abimeleki, mweneuyo wakamuchimbizga ndipo wakaruta. Ndichindikenge FUMU nyengo zose, nditi ndirumbe iyo kwambula kurekezga.

²Umoyo wane ukuthumbwira mwa FUMU, ŵanthu ŵakusuzgika ŵapulike na kukondwa.

³Kuzgani FUMU pamoza nane, tiyeni pamoza tichindike zina lakhe.

⁴Nkharomba FUMU ndipo yikandizgora, yikandithaska ku vyose ivyo nkhopanga.

⁵Laŵiskani kwa iyo ndipo mungweruskikenge, ntheura visko vyinu kuti vikhozgekenge soni chara.

⁶Munthu wakusokwa wakalira, ndipo FUMU yikamupulika, yikamuthaska ku visuzgo vyakhe vyose.

⁷Mungelo wa FUMU wakuvikirira awo ŵakuyipulikira, ndipo wakuŵathaska.

⁸Chetani ndipo muwone kuti FUMU njiweme, ngwa kutumbikika munthu uyo wakubisama mwa iyo.

⁹Wopani FUMU, imwe mwa ŵakupatulika ŵakhe, pakuti awo ŵakopa iyo kuti ŵakusoŵerwa kanthu chara.

¹⁰Ŵana ŵa nkharamu ŵakusoŵerwa chakurya na kuziya, kweni awo ŵakupenja FUMU, ŵakuŵa na kalikose ako nkhaweme.

¹¹Zaninge mwa ŵana ŵane, tegherezgani kwa ine, ine nditi ndimusambizgani kopa FUMU.

¹²Kasi ndi njani mwa imwe uyo wakutemwa umoyo, ndipo wakukhumbisiska kuŵa na mazuŵa ghanandi, mwakuti wakondwere na vinthu viweme?

¹³Lulimi lwako lureke kuyowoya viheni, ndipo mlomo wako ureke kuyowoya vya utesi.

¹⁴Fumako ku uheni, ndipo uchitenge uweme, penja mutende na kuwurondezga.

¹⁵Maso gha FUMU ghali pa ŵarunji, ndipo makutu ghakhe ghakutegherezga ku awo ŵakulira.

¹⁶Kweni FUMU yikwimikana na awo ŵakuchita uheni, kuti ŵapumule kukumbukika kwawo pa charu.

¹⁷Ŵarunji ŵakulira wovwiri, ndipo FUMU yikuŵapulika, ndipo yikuŵathaska ku visuzgo vyawo vyose.

¹⁸FUMU yili pafupi na awo mbakusweka mtima, ndipo yikuponoska awo ŵakutaya mtima.

¹⁹Ŵarunji ŵangaŵa na visuzgo vinandi, kweni FUMU yikuŵathaska mu visuzgo vyawo vyose.

²⁰FUMU yikusungilira viwangwa vyawo vyose, palije chiwangwa na chimoza icho chikuphyokapo.

²¹Uheni uti ukome ŵaheni, ndipo awo ŵakutinkha ŵarunji, ŵati ŵaŵe na mrandu.

²²FUMU yikuwombola umoyo wa ŵateŵeti ŵakhe, palije uyo wakubisama mwa iyo, uyo wati wasuskike.