Read new_tumbuka_bible MaSalimo 35 Bible Online

MaSalimo 35 - new_tumbuka_bible bible

MaSalimo 35

¹Salimo la Davide. Mususkane nawo, Mwe FUMU, awo ŵakususkana nane, murwe nawo awo ŵakurwa nane.

²Torani nguru na chivikiriro, ndipo mwize kuti mundovwire.

³Sororani mukondo na ndema, kuti mwimikane na awo ŵakundirondezga. Mu uphalire mzimu wane kuti, “Ine ndine Kuthaskika kwako.”

⁴Ŵalengeskeke na kukhozgeka soni, awo ŵakupenja umoyo wane! Ŵawezgekere kunyuma na kutimbanizgika, awo ŵakunozgera kundichitira chiŵembu.

⁵Ŵaŵe nga ndi mwerero wakuputwa na mphepo, para mungelo wa FUMU wakuŵachimbizga.

⁶Nthowa yawo yiŵe ya mdima na yakuteremuka, para mungelo wa FUMU wakuŵadikiska.

⁷Pakuti ŵakundibisira ukonde wawo kwambula chifukwa, ndipo ŵakundijimira mbuna kwambula chifukwa.

⁸Paranyiko liŵawire kwa mabuchibuchi, ukonde wawo uwo ŵakabisira ine uŵawire ŵekha, ŵaŵemo ŵekha na kumara petu.

⁹Ntheura mzimu wane uti usekerere mwa FUMU, ndipo ukukondwa mu kuthaskika kwakhe.

¹⁰Kaŵiro kane kose kati kayowoye kuti, “Mwe FUMU, ndi njani wakuyana na imwe? Imwe, ndimwe mukumuthaska ŵakutomboroka, kwa uyo ngwa nkhongono kuruska iyo. Imwe mukumuthaska musokwano na mukavu, kwa mweneuyo wakumuskogha.”

¹¹Ŵakaboni ŵaheni ŵakundiwukira, ŵakundifumba vinthu ivyo kuti nkhuvimanya chara.

¹²Ŵakundiwezgera uheni pa uweme, na kusokweska mzimu wane.

¹³Kweni para iwo ŵakarwaranga, ine nkhavwara chigudulu kurongora chitima. Nkhajilanga pa kuziŵizga kurya, nkharomba pakusindamira mutu pa chifuŵa chane,

¹⁴nga ndi para nkhuchitira chitima mubwezi wane, panji mukuru wane. Nkhendendekanga nga ndi uyo wakulira nyifwa ya ŵanyina, uku ndasindama na kutengera.

¹⁵Kweni para nkhakhuŵara, iwo ŵakawungana na kusekerera, ŵakawungana pamoza kuwukira ine. Vilima ivyo nkhavimanya chara, navyo vikanditetezgera kwambula kureka.

¹⁶Nga mbanthu ŵambula kopa Chiuta ŵakandiseka na muyuyuro ukuru, ŵakandimemenera mino ghawo.

¹⁷Mwe FUMU, kasi muŵenge ŵakulaŵirira waka mpaka pauli? Ndiponoskani ku kutwazura kwawo, thaskani umoyo wane ku nkharamu izi.

¹⁸Apo ndipo nditi ndimuwongani imwe, mu ungano ukuru, nditi ndimurumbani imwe mu mzinda ukuru wa ŵanthu.

¹⁹Ŵareke kusekerera pa ine ŵarwani ŵane, awo mbapusikizgi. Ŵareke kundilaŵiska na jiso liheni, awo ŵakunditinkha kwambula chifukwa.

²⁰Iwo kuti ŵakuyowoya vya mutende chara, kweni ŵazura na mazgu ghakupusikizgira, awo ŵakutemwa mutende mu charu.

²¹Wakundiyasamira milomo yawo ŵakuti, “Eya, Eya! Maso ghithu ghawona ivyo wachita.”

²²Mwe FUMU, mwachiwona ichi, mureke kukhara waka chete, mureke kuŵa kutali na ine.

²³Wukirani muchanya kuti mundivikirire pa mrandu wane, mweruzge mrandu wane mwe Chiuta na FUMU yane.

²⁴Mwe FUMU, Chiuta wane, yowoyani kuti ndilive mrandu, kwakuyana na urunji winu. Mungazomerezga kuti ŵarwani ŵane ŵakondwe, chifukwa cha visuzgo vyane.

²⁵Ŵareke kuyowoya mu mitima yawo kuti, “Inya ntheura ndimo tikakhumbiranga.” Ŵareke kuyowoya kuti, “Tamumirimitizga.”

²⁶Wose awo ŵakusekerera pakukomwa kwane, ŵakhozgeke soni na kutimbanizgika nkhanira. Muŵakhozge soni na kuŵayuyura, awo ŵakujitunthumura kuti ŵali makora kuruska ine.

²⁷Awo ŵakusekerera kuti ndiŵe wambula mrandu, ŵachemerezge na chimwemwe ndipo ŵakondwe, na kuyowoya kwambula kureka kuti, “FUMU njikuru nadi, yikukondwa para muteŵeti wakhe wakukhara makora.”

²⁸Penepapo nditi ndipharazge za urunji winu, ndipo nditi ndimurumbani mazuŵa ghose.