Read new_tumbuka_bible MaSalimo 36 Bible Online

MaSalimo 36 - new_tumbuka_bible bible

MaSalimo 36

¹Kwa uyo wakwimbiska sumu. Salimo la Davide, muteŵeti wa FUMU. Kwananga kukuyowoya kwa munthu muheni mukatikati mu mtima wakhe. “Mwa iyo mulije chifukwa cha kumopera Chiuta.”

²Wakujipusika mu maghanoghano ghakhe, kuti kwananga kwakhe kungabowozgeka chara na kukutinkha.

³Mazgu agho wakuyowoya ngaheni na gha upusikizgi. Iyo kuti wakuchitaso vya mahara panji viweme chara.

⁴Wakughanaghana vya kuchita ubendezi para wagona pa chitara chakhe. Wakwenda mu nthowa izo kuti nziweme chara, ndipo uheni kuti wakuwukana chara.

⁵Mwe FUMU, chisungusungu chinu chikuya kafika mpaka kuchanya, ndipo kugomezgeka kwinu kukuya kafika mpaka ku maŵingu.

⁶Urunji winu ngutali nga ndi mapiri gha Chiuta, ŵeruzgi ŵinu ngwa kuzonthoka nga ndi ndimba yikuru. Mwe FUMU, ndimwe mukupwererera ŵanthu na vinyama wuwo.

⁷Chisungusungu chinu, Mwe Chiuta, nchakuzirwa chomene. Ŵanthu ŵakubisama mu mufwiri wa mapapindo ghinu.

⁸Ŵakurya vyamanuni vya mu nyumba yinu, ndipo mukuŵamweska maji kufuma mu mronga wa vitumbiko vyinu.

⁹Kwa imwe ndiko kuli kaŵinduŵindu wa umoyo. Mu ungweru winu nase tikuwona ungweru.

¹⁰Inya, rutirizgani kurongora chisungusungu chinu ku awo ŵakumumanyani. Rutirizgani kuŵachitira vinthu viweme awo mbakunyoroka mu mtima.

¹¹Mureke kuzomerezga kuti ŵanthu ŵakujikuzga ŵanditindinizgire pasi ndipo kuti mawoko gha ŵanthu ŵaheni ghandichimbizge.

¹²Ŵanthu awo ŵakuchita ubendezi ŵali ngundangunda penepara. Imwe mwaŵawiska pasi ndipo wakutondeka na kuwuka wuwo.