Read new_tumbuka_bible MaSalimo 37 Bible Online

MaSalimo 37 - new_tumbuka_bible bible

MaSalimo 37

¹Salimo la Davide. Ureke kukweŵeka chifukwa cha ŵabendezi, nesi kuŵa na sanje na awo ŵakuchita uheni.

²Iwo ŵati ŵafotenge maluŵiro nga ndi utheka, na komira nga ndi chivwati chiŵisi.

³Ugomezge FUMU ndipo uchitenge uweme. Ntheura uti ukharenge mu charu na kuŵa na chimango.

⁴Ukondwerenge mu FUMU, ndipo yiti yikupe ivyo mtima wako ukukhumba.

⁵Ujipereke mu mawoko gha FUMU. Gomezga mwa iyo ndipo iyo yikovwirenge.

⁶Yiti yirongore urunji wako pakweru nga mbungweru, na weruzgi wako wakunyoroka nga muhanya pakati.

⁷Khara chete panthazi pa FUMU, ndipo uyilindilire mwakuzizipizga. Ureke kujikweŵeska na munthu uyo vinthu vikumwendera makora, nanga ndi uyo wakuchita uheni uwo wanozgera.

⁸Ureke kuphya mtima na kukwiya. Ureke kukweŵeskeka chifukwa ichi chikurazga ku uheni ndipera.

⁹Pakuti ŵanthu ŵaheni ŵati ŵasakazike, kweni awo ŵakugomezga FUMU ŵati ŵapokerenge charu kuŵa chawo.

¹⁰Pakhara nyengo yichoko waka, munthu muheni wati waŵengekoso chara. Nanga ulaŵisiske pa malo apo wakaŵa uti umuwonengepo chara.

¹¹Kweni ŵanthu ŵakuzika ŵara ŵaharenge charu, ndipo ŵati ŵakondwerenge chifukwa cha viweme vinandi.

¹²Munthu muheni wakuchitira chiŵembu uyo ndi murunji, na kumumemenera mino.

¹³Kweni FUMU yikumuseka muheni yura, chifukwa yikuwona kuti zuŵa lakhe la umaliro laneng'enera.

¹⁴Ŵaheni ŵakusorora malupanga na kupinda mauta ghawo, kuti ŵakome ŵakavu na ŵasokwano, ndiposo na awo mbarunji.

¹⁵Kweni lupanga lawo liti lilase mitima ya iwo ŵene, ndipo mauta ghawo ghati gha phyokenge.

¹⁶Nkhuwemiko kuŵa murunji na tunthu tuchoko kuruska kuŵa na vinthu vinandi ivyo ŵanthu ŵaheni ŵali navyo.

¹⁷Pakuti nkhongono za ŵanthu ŵaheni ziti zipwararikenge, kweni FUMU yiti yifighilire ŵarunji.

¹⁸FUMU yikumanya mazuŵa gha ŵanthu ŵambula kafukwa, ndipo chiharo chawo chiti chikhalirirenge kwa muyirayira.

¹⁹Mu nyengo ya visuzgo iwo ŵati ŵasuzgikenge chara, mu nyengo ya njara iwo ŵati waŵe na vyakuzara.

²⁰Kweni ŵaheni ŵakumara petu. Ŵarwani ŵa FUMU ŵakufota nga ndi kutowa kwa maluhari, ŵakumwalalikira waka nga ndi josi. Kweni munthu murunji ngwa mtima uweme na wakupa.

²¹Munthu muheni wakubwereka kweni kuti wakuwezga chara. Munthu murunji ngwa mtima wa wanangwa na wakupa.

²²Ŵanthu awo FUMU yili kuŵatumbika, ŵati ŵapokenge charu kuŵa chawo, kweni awo FUMU yili kuŵatemba ŵati ŵasakazike.

²³FUMU yikurongozga umo munthu wakwenera kwendera yikumukhozga uyo mendero ghakhe yikucha nagho.

²⁴Nanga wawe, kuti wati wawire nkhanira chara, pakuti FUMU yikumukora pa woko.

²⁵Kufuma pa wanichi mpaka sono apo ndili murara, ndilije kuwonapo kuti munthu murunji wasidike nanga ndi ŵana ŵakhe kuti waŵe ŵakupemphapempha vyakurya.

²⁶Nyengo yose munthu murunji wakupereka na mtima wose, ndipo wakubwerekeska mwa wanangwa. Ŵana ŵakhe ŵakuŵa vitumbiko.

²⁷Patukako ku uheni ndipo uchitenge uweme. Ntheura wizamkuŵa wakukhazikika kwa muyirayira.

²⁸FUMU yikutemwa weruzgi wakunyoroka. Iyo yizamkuŵareka ŵekha ŵakupulikana ŵakhe chara. Ŵarunji ŵati ŵasungilirike kwa muyirayira, kweni mphapu ya ŵaheni yiti yimarenge.

²⁹Ŵarunji ŵati ŵapoke charu kuŵa chawo, na kukhara mwenemumo kwa muyirayira.

³⁰Mlomo wa munthu muweme ukuyowoya vinthu vya mahara, ndipo lulimi lwakhe lukuyowoya vya urunji.

³¹Wakusunga marango gha Chiuta wakhe mu mtima wakhe, ndipo iyo kuti wakupuruka chara.

³²Munthu muheni wakuŵenda murunji, ndipo wakupenjerera kuti wamukome.

³³FUMU yiti yimurekenge mu nkhongono za munthu muheni yura chara, nanga nkhuzomerezga kuti wasuskike para wakweruzgika.

³⁴Gomezga FUMU ndipo wende mu nthowa zakhe. Ntheura wati wakukwezge kuti upokere charu kuŵa chako. Wamkuwona ŵanthu ŵaheni ŵakumara petu.

³⁵Ndili kuwonapo munthu muheni wankhaza chomene, wakujikwezga nga ndi milanje ya ku Lebanoni.

³⁶Para nkhajumphangaposo, wona kuti nkhamuwonaposo chara. Pamanyuma para nkhamupenjapenja, kuti wakasangika chara.

³⁷Uŵaŵanike ŵanthu ŵambula kalema uŵawoneseske ŵanthu ŵarunji, pakuti munthu wa mutende, waŵenge na ŵana ŵanandi kunthazi.

³⁸Kweni ŵakwananga ŵati ŵamarenge petu, ŵana ŵa ku kunthazi wa ŵaheni ŵati ŵamare.

³⁹Chiponosko cha ŵanthu ŵarunji chikufumira kwa FUMU. Iyo ndiyo kwakuchimbilira ŵanthu aŵa mu nyengo ya visuzgo.

⁴⁰FUMU yikuŵawovwira na kuŵaponoska. Yikuŵathaska ku ŵanthu ŵaheni na kuŵawombola chifukwa iwo ŵakuchimbilira kwa iyo.