Read new_tumbuka_bible MaSalimo 38 Bible Online

MaSalimo 38 - new_tumbuka_bible bible

MaSalimo 38

¹Salimo la Davide lwakuperekera sembe ya chikumbusko. Mwe FUMU, mureke kundichenya para mwakwiya nanga nkhundilanga para mwaphya mtima.

²Chifukwa mivwi yinu yandilasa, ndipo woko linu landinyekezga.

³Mu thupi lane mulije nkhongono, chifukwa cha ukari winu. Thupi lane lose larombotoka, chifukwa cha kwananga kwane.

⁴Maubendezi ghane ghandibizga musinkhu, ghazotopa nga ndi katundu wakujumpha nkhongono zane.

⁵Vilonda vyane vikuvunda ndipo vikununkha, chifukwa cha kupusa kwane.

⁶Ndakokonyara ndipo ndagona kavunama. Muhanya wose nkhutandara kulira pera.

⁷Mu chiuno chane mukuŵinya chomene, ndipo mu thupi lane mulije nkhongono.

⁸Ndamalirathu ndipo ndatekenyeka. Nkhutampha chifukwa cha kukweŵeka kwa mtima kwane.

⁹Fumu, mukumanya vyose ivyo nkhunwekera, ndipo kutampha kwane mukureka kupulika chara.

¹⁰Mtima wane ukukhung'uska, nkhongono zandimalira, maso ghane ghakutondeka kuwona ungweru.

¹¹Ŵakutemweka ŵane pamoza na ŵanyane ŵangakhara pafupi chara, chifukwa cha matenda ghane. Ŵabali ŵane nawo ŵakwimilira kutali.

¹²Awo ŵakupenja umoyo wane ŵakundithyera vipingo. Ndipo awo ŵakupenja kundipweteka, ŵakuyowoya vinthu ivyo vingandisakaza.

¹³Kweni ndili nga munthu wakumangwa makutu, kuti nkhupulika kanthu chara. Ndili nga wa mbuwu, mweneuyo kuti wakuyowoya chara.

¹⁴Inya, ndili nga munthu uyo wakureka kupulika, ndipo wangazgorapo kanthu chara.

¹⁵Kweni nkhulindizga kwa imwe, Mwe FUMU. Ndimwe, Mwe FUMU, Chiuta wane, imwe muti mundizgore.

¹⁶Pakuti ine nkhuromba nkhuti, “Mureke kuzomerezga kuti ŵakondwere pa ine, awo ŵakundinyoza para ŵawona kuti nkhuteremuka.”

¹⁷Ndili pafupi kuwa, ndipo nkhupulika vyakuŵinya nyengo zose.

¹⁸Nkhuzomera maubendezi ghane, ndili na chitima chifukwa cha kwananga kwane.

¹⁹Awo mbarwani ŵane kwambula chifukwa mbankhongono, ndipo awo ŵakunditinkha kwambula mrandu mbanandi.

²⁰Awo ŵakundiwezgera uheni mu malo mwa uweme, ndiwo mbarwani ŵane, chifukwa ine nkhuchita vinthu viweme.

²¹Mwe FUMU, mungandisidanga chara. Mwe Chiuta wane, mureke kuŵa kutali na ine.

²²Mwendeske kwiza kandovwira, imwe Fumu, Muponoski wane.