Read new_tumbuka_bible MaSalimo 39 Bible Online

MaSalimo 39 - new_tumbuka_bible bible

MaSalimo 39

¹Kwa uyo wakwimbiska sumu. Kurondezga kimbiro ka Yedutuni. Salimo la Davide. Nkhayowoya nkhati, “Nditi ndipwerere mendero ghane, mwakuti ndireke kwananga na lulimi. Nditi ndikhare waka chete nyengo zose para ŵanthu ŵaheni ŵali pafupi nane.”

²Ntheura nkhakhara waka chete kwambula kuyowoya kalikose. Nkhakhara waka phee kwambula kwandulapo kanthu. Chitima chane chikakulirangakuliranga.

³Nkhasuzgika chomene mu mtima wane. Apo nkhaŵa ndichali kulanguruka, mtima wane ukagolera nga ndi moto. Penepapo nkhayowoya na mazgu ghakuti,

⁴“FUMU, mundimanyiske apo ine ndifwirenge, mundimanyiske mazuŵa ghane agho ghakharako. Mundiphalire kuti umoyo wane umarenge luŵiro.”

⁵Wonani, mwandipa mazuŵa ghachoko chomene. Nyengo ya umoyo wane nkhanthu chara pa maso pinu. Inya, munthu waliyose wali nga nkhamuvuchi waka.

⁶Inya, munthu wakwenda nga ndi muzgezge, wakusuzgika waka na vyawakawaka. Munthu wakuwunjika vyuma, kweni wakumanya chara uyo wizamkuvirya.

⁷Imwe Fumu, kasi sono nkhulindirirachi? Chigomezgo chane chili mwa imwe.

⁸Ndithaskani ku zakwananga zane zose. Mureke kundizgora kuŵa chisunjizgo cha ŵakupusa.

⁹Ndili mbuwu, ndipo nkhuyowoya chara, pakuti imwe ndimwe muli kuchita ichi.

¹⁰Wuskanipo chilango chinu pa ine. Ndaghanda chifukwa cha makofi ghinu.

¹¹Imwe mukumulanga munthu pakumuchenya chifukwa cha zakwananga zakhe. Mukumara petu ivyo iyo wakuvitemwa, nga ndi umo yikuchitira fufuzi. Nadidi, munthu waliyose nkhamuvuchi waka.

¹²Pulikani lurombo lwane, Mwe FUMU, ndipo tegherezgani ku kulira kwane. Mureke kukhara waka chete apo ine nkhulira kwa imwe. Ndine mulendo winu wambula kukhariska, mweneuyo wakupanjwa waka nga ndi umo ŵakachitira ŵasekuru ŵane wose.

¹³Mureke kundilaŵiska mwa ukari, mwakuti ndimanye kukondwera, pambere ndindafwe na kuzgeŵerekera.