Read new_tumbuka_bible MaSalimo 40 Bible Online

MaSalimo 40 - new_tumbuka_bible bible

MaSalimo 40

¹Kwa uyo wakwimbiska sumu. Salimo la Davide. Nkhayilindizga FUMU mwakuzizipizga. Iyo yikasindamira pasi kulaŵiska kwa ine, ndipo yikapulika kulira kwane.

²Yikandifumiskamo mu mbuna yakofya, mu chinkhando cha mathakalimbwa. Yikandimika pa jarawe, na kukhozga malundi ghane.

³Yikaŵika sumu yiphya mu mlomo wane, sumu ya marumbo kwa Chiuta withu. Ŵanthu ŵanandi ŵati ŵawonenge na kopa, ndipo ŵati ŵagomezgenge FUMU.

⁴Ngwakutumbikika munthu uyo wakugomezga FUMU, uyo kuti wakuzgokera ku ŵakujikuzga chara, nanga nkhurondezga ŵachiuta ŵa utesi.

⁵Mwe FUMU, Chiuta wane, mwatichitira milimo yakuzizwiska yinandi, ndipo mwatinozgera viweme vinandi. Palije na yumoza uyo wangalingana namwe. Usange ndingaphara na kwandula za ivyo, kuti ndingayowoya vyose chara, chifukwa nvinandi na vyambula mapendeko.

⁶Sembe na vyakupereka kuti mukuvikhumba chara, kweni mwajula makutu ghane kuti ndipulike. Sembe zakocha mburuma na sembe za zakwananga, kuti mwazikhumba chara.

⁷Penepapo nkhayowoya kuti, “Ndine pano! Ine nkhwiza, nga ndi umo kuli kulembekera na za ine mu Buku la Marango.

⁸Nkhukondwa kuchita khumbo linu, Mwe Chiuta wane. Dango linu nalo liri mu mtima wane.”

⁹Ndapharazga makani ghaweme gha kuthaskika, pa mpingo ukuru wa ŵanthu. Ine ndilije kurekezga kuyowoya, nga ndi umo mukumanyira, Mwe FUMU.

¹⁰Ndilije kubisa mu mtima wane kuti imwe ndimwe ŵarunji. Ndapharazga zakugomezgeka kwinu na umo mwandiponoskera. Ndilije kubisa ku mpingo za ukuru wa chisungusungu chinu, na za kugomezgeka kwinu.

¹¹Mwe FUMU, mureke kuwuskapo lusungu lwinu pa ine. Chisungusungu na unenesko winu vindisungilire nyengo zose.

¹²Visuzgo vyambula mapendeko vyandizingirizga, ndipo maubendezi ghane ghandisanga, mwakuti nkhutondeka na kulaŵiska. Nvinandi chomene kuruska sisi la ku mutu wane, ndipo mtima wane ukuthika lusoko.

¹³Mwe FUMU, nkhumurombani kuti mundithaske. Mwe FUMU, mwendeske kwiza kandovwira.

¹⁴Ŵanthu awo ŵakukhumba kukwapura umoyo wane, ŵakhozgeke soni na kutimbanizgika. Ŵanthu awo ŵakukhumba kundipweteka, ŵawezgekere kunyuma na kuyuyurika.

¹⁵Ŵanthu awo ŵakundiseka ine kuti, “Ehe, Ehe,” ŵafumepo na kukhozgeka soni chifukwa ŵatondeka.

¹⁶Kweni wose awo ŵakumupenjani, ŵakondwe na kusekerera chifukwa cha imwe. Awo ŵakutemwa chiponosko chinu, ŵayowoye nyengo zose kuti, “FUMU njikuru!”

¹⁷Kweni ine ndili mukavu na musauchi, Kweni FUMU yikundighanaghanira. Imwe ndimwe movwiri wane na muthaski wane. Mwe Chiuta wane mungaziurikanga chara kwiza kandovwira.