Read new_tumbuka_bible MaSalimo 41 Bible Online

MaSalimo 41 - new_tumbuka_bible bible

MaSalimo 41

¹Kwa uyo wakwimbiska sumu. Salimo la Davide. Ngwakutumbikika munthu uyo wakughanaghanira awo mbakavu, chifukwa munthu wa ntheura FUMU yikumuthaska mu nyengo ya visuzgo.

²FUMU yikumuvikirira na kumusunga na umoyo. Iyo wakuchemeka kuti ngwa kutumbikika mu charu. FUMU kuti yimuperekenge ku ŵarwani ŵakhe chara, kuti ŵachite nayo ivyo ŵakukhumba.

³FUMU yikumufukatira para warwara, ndipo yikumuchizga ku maurwari ghakhe ghose.

⁴Sono ine nkhati, “Mwe FUMU mundilengere lusungu. Mundichizge chifukwa ndamunangirani.”

⁵Kweni chifukwa cha tinkho, ŵarwani ŵane ŵakuyowoya vya ine ŵakuti, “Kasi wati wafwenge pauli kuti zina lakhe limare petu?”

⁶Para munthu wiza kuti wandiwone, wakuyowoya mwakupusika. Mtima wakhe ukughanaghana viheni pera, Para wafumapo waka, wakupharazga kosekose.

⁷Wose awo ŵakunditinkha ŵakuphwepwerezgana vya ine, ŵakughanaghana viheni na za ine.

⁸Iwo ŵakuti, “Nthenda yakofya yamukora. Apo wagona kuti wawukengepo chara.”

⁹Nanga ndi mubwezi wane wa pa mtima, uyo nkhamugomezga, uyo wakarya chingwa pamoza nane, nayo wandiwukira.

¹⁰Kweni mundichitire lusungu, Mwe FUMU, mundichizge kuti ndiŵawezgere nduzga.

¹¹Para mwachita ntheura ndimanyenge kuti mukukondwa nane, pakuti murwani wane walije kundiruska.

¹²Imwe mwandifighilira chifukwa cha kugomezgeka kwane, mwandiŵika panthazi pinu kwa muyirayira.

¹³Yitumbikike FUMU, Chiuta wa Israele, nyengo zose na muyirayira swii! Ameni! Ameni!