Read new_tumbuka_bible MaSalimo 42 Bible Online

MaSalimo 42 - new_tumbuka_bible bible

MaSalimo 42

¹Kwa uyo wakwimbiska sumu. Sumu ya ŵana ŵa Kora. Umo nyiska yikunwekera tumironga twa maji, ndimo mzimu wane ukunwekera imwe, Mwe Chiuta wane.

²Mzimu wane uli na nyota ya kukhumba imwe Chiuta, Chiuta wamoyo. Kasi ndizamkwiza pauli pa maso pa Chiuta?

³Masozi ghane ghaŵa nga nchakurya pakuti nkhulira muhanya na usiku. Ŵanthu ŵakundifumba waka nyengo zose kuti, “Kasi Chiuta wako wali nkhu?”

⁴Mtima wane ukuŵinya para nkhukumbuka, umo nkhenderanga pamoza na mpingo wa ŵanthu, pakuŵarongozga, pakuruta ku Nyumba ya Chiuta, na nchemerezgo ya kukondwa pamoza na sumu za kuwonga, mukati mu mzinda wa ŵanthu awo ŵakachitanga chiphikiro.

⁵Kasi wafipirachi mtima, wa mzimu wane, ndipo kasi ukukweŵekerachi ntheura mukati mwane? Gomezga Chiuta chifukwa nditi ndimurumbeso. Iyo ndi movwiri wane na Chiuta wane.

⁶Mzimu wane wafipa mtima mukati mwane, ndicho chifukwa nkhumukumbukani imwe, apo ndili ku charu cha Yorodani, ku Heremoni na ku Phiri la Mizara.

⁷Ndimba yikuchemerezga ku ndimba yinyakhe, pakududumira kwa vipopoma vyinu. Majigha ghinu ghose na maŵiruŵiru ghinu vyandibizga.

⁸Na muhanya, FUMU yikundirongora chisungusungu chakhe. Na usiku, nkhuyimba sumu yeneiyo ndi lurombo lwane, kwa Chiuta mweneuyo wakundipa umoyo.

⁹Nkhufumba Chiuta, jarawe lane, nkhuti, “Kasi mwandiruwirachi ine? Nkhwenderachi uku nkhulira chifukwa cha kuzotofyeka na murwani wane.”

¹⁰Nga nchilonda cha zoza mu thupi lane, ŵarwani ŵane ŵakunditombozga, apo ŵakundinena kwambula kureka kuti, “Kasi Chiuta wako wali nkhu?”

¹¹Kasi wafipirachi mtima, wa mzimu wane, ndipo kasi ukukweŵekerachi ntheura mukati mwane? Gomezga Chiuta chifukwa nditi ndimurumbengeso. Iyo ndi movwiri wane na Chiuta wane.