Read new_tumbuka_bible MaSalimo 44 Bible Online

MaSalimo 44 - new_tumbuka_bible bible

MaSalimo 44

¹Kwa uyo wakwimbiska sumu. Sumu ya ŵana ŵa Kora. Mwe Chiuta withu, tajipulikira na makutu ghithu. Ŵasekuru ŵithu ŵatandulira milimo iyo mukachita mu mazuŵa ghawo, mu nyengo za mwaka.

²Imwe mwekha mukachimbizga ŵamitundu, kweni ŵasekuru ŵithu mukaŵakhazika mu charu chawo. Imwe mukaŵasuzga ŵanthu ŵa mitundu yinyakhe, kweni ŵasekuru ŵithu mukaŵapa wanangwa.

³Iwo kuti ŵakapoka charu na lupanga lwawo chara, panji nesi kutonda pa nkhondo chifukwa cha nkhongono zawo. Kweni ŵakaŵatonda na nkhongono zinu, chifukwa cha ungweru wa chisko chinu, pakuti mukaŵatemwa nadi.

⁴Imwe ndimwe Karonga na Chiuta wane, mweneuyo wakamupa Yakhobe kuvivya.

⁵Mwa imwe tikuwiskira pasi ŵarwani ŵithu. Mu zina linu tikuŵakandira pasi awo ŵakutiwukira.

⁶Ine kuti nkhugomezga uta wane chara, nanga ndi lupanga lwane kuti lingandiponoska chara.

⁷Kweni imwe mwatiwombola ku ŵarwani ŵithu, ndipo mwaŵatimbanizga awo ŵakutitinkha.

⁸Mwa imwe Chiuta ndimo takhara tikuthumbwira nyengo zose, ndipo tizamkuwonga zina linu kwa muyirayira.

⁹Ndipouli imwe mwatitaya kutali na kutiyuyura, mulije kuruta nawo ŵankhondo ŵithu.

¹⁰Imwe mwachita kuti tiwerere nyuma ku awo ŵakupindikana nase, ndipo ŵarwani ŵithu ŵaskogha vinthu vyithu.

¹¹Mwatizgora kuŵa nga ndi mberere na mbuzi izo zamukomeka, ndipo mwatimbininiskira mukati mu ŵanthu ŵa mitundu yinyakhe.

¹²Mwaguliska ŵanthu ŵinu pa mtengo uchoko, kwambula kuphindulapo kalikose.

¹³Mwatizgora kuŵa ŵanthu ŵakutombozgeka. Taŵa chimuhoyere na ŵakunyozeka kwa awo ŵatizingirizga.

¹⁴Mwatizgora kuŵa ŵanthu ŵakuhoyeka mukati mu ŵanthu ŵa mitundu yinyakhe, na kuŵa chinthu icho ŵanthu ŵakupukunya nacho mitu.

¹⁵Zuŵa lose nkhujiwona nga munthu wabwekabweka, ndipo nkhuŵa wakukhozgeka soni,

¹⁶pakupulika mazgu gha awo ŵakundisunjizga na kundituka, na pakuwona ŵarwani ŵane na ŵanthu awo ŵakuwezgera nduzga.

¹⁷Vyose ivi vyatiwira ise nangauli tilije kumuruwani imwe, nesi kuswa phangano linu.

¹⁸Mtima withu ulije kuwerera nyuma, malundi ghithu ghalije kureka kwenda mu nthowa yinu.

¹⁹Kweni imwe mwatiphwanya ndipo mwatibenekerera na chisi chikuru chomene uko ŵakambwe ŵakukhara.

²⁰Tiŵenge kuti tikaruwa Chiuta withu panji kulambira chiuta wachilendo,

²¹asi Chiuta mphanyi wali kuchisanga ichi. Pakuti iyo wakumanya vyakubisika vyose vya mu mtima.

²²Kweni chifukwa cha imwe, ise tikukomeka zuŵa na zuŵa, ndipo tikupimika nga ndi mberere izo zapimikira kukomeka.

²³Wukani, mwe Fumu! Chifukwa uli mwagona? Kharani maso. Mureke kutitaya kwa muyirayira.

²⁴Kasi mwabisirachi chisko chinu? Kasi mwaruwirachi suzgo yithu na kuzotofyeka kwithu.

²⁵Ise tawa pasi pa fuvu ndipo mathupi ghithu ghademerera pa dongo.

²⁶Wukani! Zaninge mutovwire. Mutiwombole chifukwa cha chisungusungu chinu.