Read new_tumbuka_bible MaSalimo 45 Bible Online

MaSalimo 45 - new_tumbuka_bible bible

MaSalimo 45

¹Kwa uyo wakwimbiska sumu: Kwakuyana na maluŵa. Sumu ya ŵana ŵa Kora. Sumu ya chitemwa. Mtima wane ukufuruka na makani ghaweme. Nkhuyowoya kwa karonga mazgu agho ndanozga. Lulimi lwane luri nga nchakulembera cha mulembi uyo ndi nkhwantha.

²Imwe ndimwe wakutowa chomene kwakuruska ŵanthu wose. Mlomo wako ukuyowoya vinthu viweme pera, pakuti Chiuta wakutumbika iwe kwa muyirayira.

³Iwe chinkhara mu nkhondo, kakilira lupanga lwako mu chiuno, mu uchindami na mu ufumunkhuru wako.

⁴Kwera hachi mwa kuvivya mu ufumunkhuru wako, chifukwa cha kukhumba unenesko na kuvikirira urunji. Woko lako la maryero lirongore milimo yakofya.

⁵Mivwi yako njakuthwa, yikulasa mitima ya ŵarwani ŵakaronga. Ŵamitundu ŵakuwa pasi pa malundi ghako.

⁶Chizumbe chinu, Mwe Chiuta, ncha muyirayira! Ndodo ya urunji ndi ndodo ya ufumu winu.

⁷Mukutemwa urunji na kutinkha uheni. Ntheura Chiuta, Chiuta wako, wakuphakazga iwe na mafuta gha chimwemwe kuruska ŵanyako.

⁸Vyakuvwara vyako vyose vili na sungu liweme la mure, chinthembwe na la khuni la kasiya. Mu nyumba zinu za ufumu izo nzakuzengeka na minyanga, ŵimbi ŵakumukondweskani na vya kulizgira vya malusinga.

⁹Ŵana ŵanakazi ŵa ŵakaronga ŵali pamoza na ŵanakazi ŵakuzirwa. Ku woko lako la maryero, kwimilira fumukazi iyo yavwara vya golide la ku Ofiri.

¹⁰Pulika iwe wa mwana mwanakazi, ghanaghana makora na kutegherezga khutu lako. Ruwako ŵanthu ŵa kukwako na nyumba ya ŵawuso.

¹¹Karonga wati wadokerenge kutowa kwako. Umulambirenge pakuti iyo ndiyo sekuru wako.

¹²Ŵanthu ŵa ku charu cha Ture ŵati ŵakunyengerere, kuti uŵatemwe pakukupa vyawanangwa. Ŵanthu ŵasambazi chomene ŵati ŵakunyengerere nadi

¹³na usambazi wa mitundumitundu. Mwana mwanakazi wa karonga wali mu chipinda chakhe, wavwarikika vyakuvwara vyakupeta na golide.

¹⁴Ŵakuruta nayo kwa karonga uku wavwara vyakuvwara vya maŵangamaŵanga pamoza na ŵateŵeti-kazi ŵakhe awo ŵakumuperekezga.

¹⁵Ŵakuya kaŵaperekezga na chimwemwe na kusekerera apo ŵakunjira mu nyumba ya ufumu ya karonga.

¹⁶Ŵana ŵinu ndiwo ŵati ŵatorenge malo gha ŵasekuru ŵinu. Imwe muti muŵimike kuŵa nduna mu charu chose.

¹⁷Ndamkuchita kuti zina lako likumbukike mu miwiro yose, mwakuti mafuko ghose ghakulumbenge iwe kwa muyirayira swii!