Read new_tumbuka_bible MaSalimo 46 Bible Online

MaSalimo 46 - new_tumbuka_bible bible

MaSalimo 46

¹Kwa uyo wakwimbiska sumu. Salimo la ŵana ŵa Kora. Kwakuyana na kimbiro ka Alamoti. Sumu. Chiuta ndiyo linga lithu ndiposo ndiyo nkhongono zithu. Iyo ngwa kunozgeka kutovwira mu nyengo ya suzgo.

²Ntheura ise kuti topengepo chara nanga charu chizgoke, nanga mapiri ghasunkhunyike mukati mu nyanja,

³nanga maji ghakhe ghapopome na kuvunduka, nanga mapiri ghatentheme na kupoma kwakhe.

⁴Kweni kuli mronga uwo mphandukira zakhe zikukondweska ŵanthu ŵa mu msumba wa Chiuta, malo ghakupatulika gha Chiuta Chikurukuru.

⁵Chiuta wali mukati mu msumba ura, kuti uti upasukenge chara. Chiuta wati wawovwirenge na mulenjelenje.

⁶Mafuko ghanyakhe ghakunjenjemera, maufumu ghakusunkhunyika. Chiuta wakuyowoya waka lizgu, charu cha pasi chikusongonoka.

⁷FUMU Mwenenkhongono zose yili nase. Chiuta wa Yakhobe ndiyo mphanji yithu.

⁸Zaninge muwone milimo ya FUMU, umo yachitira vyakuzukumiska pa charu cha pasi.

⁹Iyo yikurekeska zinkhondo mpaka ku mphererekezgo za charu. Yikuphyora mauta na kunyongorora mikondo. Yikocha magareta na moto.

¹⁰Iyo yikuti, “Kharani chete, ndipo mumanye kuti ine ndine Chiuta. Mafuko ghakundichindika, ndine wakukwezgeka mu charu.”

¹¹FUMU Mwenenkhongono zose yili nase. Chiuta wa Yakhobe ndiyo mphanji yithu.