Read new_tumbuka_bible MaSalimo 47 Bible Online

MaSalimo 47 - new_tumbuka_bible bible

MaSalimo 47

¹Kwa uyo wakwimbiska sumu. Salimo la ŵana ŵa Kora. Mwa ŵanthu mose, kuŵani makwa! Chemerezgani kwa Chiuta na sumu za chimwemwe!

²Pakuti FUMU Chikurukuru, njakofya, ndi karonga mukuru pa charu chose cha pasi.

³Iyo yili kutithereskera mitundu yinyakhe kuti yiŵe pasi pithu, na mafuko gha ŵanthu kuti tighawusenge.

⁴Yili kutisankhira charu kuŵa chiharo chithu cheneicho wakuthumbwiramo Yakhobe uyo wakumutemwa.

⁵Chiuta wakwerera ku chizumbe chakhe na mphomo ya chimwemwe, FUMU yakwera na kulira kwa mbata.

⁶Yimbani sumu za kurumba Chiuta. Inya yimbani sumu za marumbo. Yimbani sumu za kurumba karonga withu! Inya, yimbani sumu za marumbo.

⁷Chifukwa Chiuta ndiyo Karonga wa charu chose cha pasi. Mwimbirani marumbo na sumu za Salimo.

⁸Chiuta wakuwusa mafuko gha ŵanthu. Chiuta wakukhara pa chizumbe chakhe chakupatulika.

⁹Ŵakaronga ŵa mitundu yinyakhe ŵakuwungana pamoza na ŵanthu ŵa Chiuta wa Abrahamu. Maufumu ghose gha pa charu cha pasi nga iyo Chiuta. Iyo ndiyo ngwa kuchindikika kwakuruska.