Read new_tumbuka_bible MaSalimo 49 Bible Online

MaSalimo 49 - new_tumbuka_bible bible

MaSalimo 49

¹Kwa uyo wakwimbiska sumu. Salimo la ŵana ŵa Kora. Pulikani ichi, imwe mwa ŵamitundu wose. Tegherezgani makutu ghinu, imwe mose mukukhara pa charu cha pasi.

²Tegherezgani mwa ŵanthu ŵa pasi na ŵa pachanya, ŵasambazi na ŵakavu, mose pamoza.

³Mlomo wane uti uyowoyenge vinthu vya mahara. Maghanoghano gha mu mtima wane, ghati ghaŵenge ghakumanyiska makora.

⁴Nditi nditegherezge khutu lane ku ntharika. Nditi ndirongosore chinthanguni chane pakulizga bango.

⁵Kasi nditi ndoperengechi pa nyengo ya visuzgo, para ndazingirizgika na ŵanthu ŵaheni awo ŵakundizikizga,

⁶ŵanthu awo ŵakugomezga mu usambazi wawo, ndipo ŵakujikuzga chifukwa ŵali na vyuma vinandi?

⁷Nadi, palije munthu uyo wangamanya kujiwombola yekha, panji uyo wangamupa Chiuta mtengo wa umoyo wakhe.

⁸Chifukwa icho chingawombola umoyo wakhe ncha mtengo wa pachanya chomene, ndipo kuti chingamanya kukwaniska chara,

⁹kuti wakhare wamoyo kwa muyirayira na kureka kuruta ku dindi.

¹⁰Inya, iyo wati wawone kuti nanga mba vinjeru ŵakufwa. Ntheura pera, ŵakupusa na awo nvindere nawo ŵakwenera kufwa, na kusidira ŵanyakhe usambazi wawo.

¹¹Mararo ghawo ndizo nyumba zawo kwa muyirayira. Inya, ndi malo ghawo ghakukharamo mu miwiro na miwiro, nangauli apo ŵakathyapo vyaru na mazina ghawo.

¹²Munthu kuti wangakhalirira chifukwa cha usambazi chara. Wakuyana waka na vinyama ivyo navyo vikufwa.

¹³Ili ndilo soka ilo likuwira ŵanthu awo ŵali na chigomezgo chakupusa. Uwu ndiwo umaliro wa ŵanthu awo ŵakukhorwa na ivyo ŵali navyo.

¹⁴Nga ndi mberere, ŵali kupimikira ku nyifwa. Nyifwa ndiyo yiti yiŵenge mliska wawo. Ŵakukhilira na kurazga ku dindi ndipera. Mathupi ghawo ghizamkuvunda, malo gha ŵakufwa ghamkuŵa nyumba yawo.

¹⁵Kweni Chiuta wati wawombole umoyo wane ku nkhongono za nyifwa, pakuti iyo wizamkundipokerera.

¹⁶Ureke kopa para munthu munyakhe wakusambazga, para usambazi wa mu nyumba yakhe ukukulirakulira.

¹⁷Chifukwa para munthu uyu wakufwa, kuti wati wayeghengepo kanthu chara. Usambazi wakhe kuti ukhirenge na kumurondezga chara.

¹⁸Nanga para iyo wachali wamoyo, wakujipima kuti ngwa kukondwa, ndipo nanga iyo warumbike para vinthu vikumwendera makora,

¹⁹wafwenge ndipera na kuya kakumana na ŵasekuru ŵakhe ku dindi, ŵeneawo kuti ŵawonengeso ungweru chara.

²⁰Munthu kuti wangakhalirira chifukwa cha usambazi chara. Wakuyana waka na vinyama ivyo navyo vikufwa.