Read new_tumbuka_bible MaSalimo 50 Bible Online

MaSalimo 50 - new_tumbuka_bible bible

MaSalimo 50

¹Salimo la Asafu. Chiuta Mwenenkhongono zose, uyo ndi FUMU, wakuyowoya, wakuchema ŵanthu ŵa pa charu cha pasi, kufuma ku mafumiro gha dazi kuya kafika ku manjiliro ghakhe.

²Chiuta wakuŵala mu Ziyoni, msumba uwo ngwa kutowa chomene.

³Chiuta withu wakwiza, kuti wakukhara chete chara. Panthazi pakhe pali moto wakumyangura, chimphupuru chikuru chamuzingirizga.

⁴Wakuchema vya mu mitambo na pa charu cha pasi mwakuti weruzge ŵanthu ŵakhe.

⁵Iyo wakati, “Wunganiskani kwa ine, ŵanthu ŵane ŵakugomezgeka, ŵeneawo ŵakachita phangano na ine pakupereka sembe.”

⁶Vya mu mutambo vikupharazga urunji wakhe, chifukwa Chiuta iyomwene ndiyo mweruzgi.

⁷Pulikani mwa ŵanthu ŵane, ndipo ine nditi ndiyowoye. Nditi ndipereke ukaboni wakususkana na imwe ŵaIsraele. Ine ndine Chiuta, inya Chiuta winu.

⁸Kuti nkhumuchenyani chifukwa cha sembe zinu zakukoma chara, pakuti nyengo zose mukupereka sembe zinu zakocha mburuma kwa ine.

⁹Nditi ndipokererenge nkhambako za mu nyumba zinu chara nanga mbapepe ŵa mu vitupa vyinu.

¹⁰Chifukwa nyama yiliyose ya mu thengere njane, pamoza na ng'ombe izo zili pa mapiri ghanandinandi.

¹¹Viyuni vyose vya mudera nkhuvimanya, vyose ivyo vikwenda mu thengere navyo nvyane.

¹²“Ndiŵenge na njara mphanyi ndangumuphalirani chara, chifukwa charu na vyose ivyo vilimo nvyane.

¹³Kasi ine nkhurya nyama ya nkhambako, panji kumwa ndopa za mbuzi?

¹⁴Perekani kwa Chiuta sembe za kuwonga, ndipo fiskani mapangano ghinu kwa Chiuta Chikurukuru.

¹⁵Murombe kwa ine mu zuŵa la suzgo. Ine ndizamkumuthaskani ndipo imwe mwizamkundichindika.”

¹⁶Kweni ku munthu muheni Chiuta wakuti, “Kasi waghatorankhu mazaza ghakuyowoyera marango ghane? Chifukwa uli mlomo wako ukuyowoya za phangano lane?

¹⁷Iwe ukutinkha kusambizgika, mazgu ghane ukughataya ku nkhonyoro.”

¹⁸“Para wawona munkhungu, ukuzgoka mubwezi wakhe, ndipo ukwendezgana na ŵanthu awo mbaleŵe.

¹⁹Ukopa chara kuyowoya viheni pa mlomo wako, lulimi lwako lukwata utesi.

²⁰Ukukhara pasi na kumunena mubali wako, ukunanga lumbiri lwa mwana wa ŵanyoko.

²¹Iwe wachita vinthu ivi, kweni ine ndakhara waka chete. Ukaghanaghana kuti nkhulingana na iwe. Kweni sono nkhukuchenya ndipo nkhuŵika mrandu pa iwe.”

²²“Ntheura panikizgani ichi, imwe mukuruwa Chiuta, mzire ndimupalureni ndipo kuŵavye na ŵakumuthaskani.

²³Uyo sembe yakhe ndi mtima wa kuwonga, wakuchindika ine. Uyo wakwenda mu nthowa za urunji, nditi ndimurongorenge chiponosko chane.”