Read new_tumbuka_bible MaSalimo 51 Bible Online

MaSalimo 51 - new_tumbuka_bible bible

MaSalimo 51

¹Kwa uyo wakwimbiska sumu. Salimo la Davide, para nchimi Natani wakamuchenya chifukwa cha kwendezgana na Batisheba. Mwe Chiuta, mundilengere lusungu, kwakuyana na chisungusungu chinu. Sisitani majuvyo ghane, kwakuyana na kuzara kwa lusungu lwinu lukuru.

²Mundisuke ubendezi wane wose, munditozge ku zakwananga zane.

³Pakuti nkhumanya majuvyo ghane, kwananga kwane kuli panthazi pa ine nyengo zose.

⁴Imwe pera, ndimwe ndamunangirani, ndachita icho nchiheni panthazi pinu. Ntheura mukuneneska para mukundisuska, ndipo ndimwe ŵarunji mu weruzgi winu.

⁵Nadi, ine nkhababika mu ubendezi, Ine nkhaŵa wakwananga kufuma apo amama ŵakatora nthumbo pa ine.

⁶Nadi, imwe mukutemwa mtima wa unenesko, ntheura ndisambizgani vinjeru mu mtima wane.

⁷Munditozge na hisopo mwakuti nditowe, mundisuke, ndiŵe mutuŵa kuruska thonje.

⁸Mundizuzge na kukondwa pamoza na kusekerera. Nangauli mwandiphyoraphyora viwangwa, zomerezgani kuti ndisekerere.

⁹Bisani chisko chinu ku zakwananga zane, ndipo sisitani maubendezi ghane ghose.

¹⁰Mwe Chiuta, lengani mtima wakutowa mwa ine. Ŵikani mukati mwane mzimu uphya na wakunyoroka.

¹¹Rekani kundifumyapo panthazi pinu, rekani kuwuskapo Mzimu winu Utuŵa pa ine.

¹²Wezgerani chimwemwe cha chiponosko chinu kwa ine, mukhozge mtima wakujipereka mwa ine.

¹³Penepapo ŵabendezi nditi ndiŵasambizge nthowa zinu, ndipo ŵakwananga ŵati ŵawerere kwa imwe.

¹⁴Mwe Chiuta, ndithaskani ku mrandu wakuthiska ndopa, imwe Chiuta Muponoski wane, ndipo lulimi lwane luti lwimbenge na kuchemerezga, chifukwa cha uthaski winu.

¹⁵Mwe Fumu, julani milomo yane, ndipo mlomo wane uti upharazge marumbo ghinu.

¹⁶Imwe kuti mukucha na sembe zakukoma bweka chara. Ndiperekenge sembe yakocha mburuma, mphanyi imwe mwakondwa nayo chara.

¹⁷Sembe iyo imwe mukupokera, Mwe Chiuta, ndi mzimu wakusweka. Mtima wakusweka na wakupera, Mwe Chiuta, kuti muwuyuyurenge chara.

¹⁸Ŵachitirani uweme ŵanthu ŵa mu Ziyoni chifukwa cha mtima winu uweme. Zenganiso malinga gha Yerusalemu.

¹⁹Penepapo ndipo muti mukondwenge na sembe zakukoma mu urunji na sembe zakocha mburuma. Ntheura ŵati ŵapereke nkhambako pa jochero linu.