Read new_tumbuka_bible MaSalimo 52 Bible Online

MaSalimo 52 - new_tumbuka_bible bible

MaSalimo 52

¹Kwa uyo wakwimbiska sumu. Sumu ya Davide apo Doyegi, wa fuko la Edomu wakiza kaphalira Sauli kuti, “Davide wafika ku mbumba ya Ahimeleki”. Iwe wa chinkhara ukujikuzgirachi na uheni? Apo chisungusungu cha Chiuta chiliko zuŵa na zuŵa?[2]

²Iwe mwati wa uryarya, lulimi lwako luri nga ndi chimeto chakuthwa.

³Ukutemwa uheni kuruska uweme, na utesi kuruska kuyowoya unenesko.

⁴Iwe wa lulimi lwa upusikizgi, ukutemwa kuyowoya mazgu ghakuyuzga ŵanyako.

⁵Kweni Chiuta wati wakuswire pasi kwa muyirayira. Wati wakukwapure na kukufumiska mu hema lako. Wati wakuzgulemo mu charu cha ŵamoyo.

⁶Ŵanthu ŵarunji ŵati ŵawone na kopa ndipo ŵati ŵamuseke iyo na kuyowoya kuti,

⁷“Wonani munthu uyo wakakana kuti Chiuta waŵe linga lakhe, kweni wakagomezga mu vyuma vyakhe vinandi, na kuzgora mausambazi ghakhe kuŵa linga lakhe.”

⁸Kweni ine ndili nga khuni la maolive mu Nyumba ya Chiuta. Nkhugomezga mu chisungusungu cha Chiuta, kwa muyirayira swii!

⁹Ndizamkumuwongani imwe kwa muyirayira, chifukwa cha ivyo mwachita. Ndizamkupharazga zina linu pa maso pa ŵanthu ŵarunji pakuti ndimwe ŵaweme.