Read new_tumbuka_bible MaSalimo 53 Bible Online

MaSalimo 53 - new_tumbuka_bible bible

MaSalimo 53

¹Kwa uyo wakwimbiska sumu. Kurondezga kimbiro ka sumu yakuti: Pa matenda. Sumu ya Davide. Mu mtima wakhe wakupusa wakuti, “Chiuta kulije.” Ŵanthu ŵa ntheura mbakubendera, ŵakuchita milimo ya ukazuzi. Palije na yumoza uyo wakuchita uweme.

²Kuchanya Chiuta wasindama, wakulaŵiska ŵanthu pano pasi. Wakukhumba kuwona usange ŵavinjeru ŵalipo, ŵeneawo ŵakumupenja nadi Chiuta.

³Kweni ŵanthu wose mbakupuruka, wose ŵakuyana waka mu ubendezi wawo. Palije na yumoza uyo wakuchita uweme. Chara! Palijirethu nanga njumoza.

⁴Kasi ŵanthu ŵaheni ŵalije nadi mahara? Iwo ŵakumirimitizga ŵanthu ŵane nga ndi chakurya, ndipo kuti ŵakumusopa Chiuta chara.

⁵Sono iwo ŵizamkuŵa na wofi ukuru, wofi uwo undawonekepo na kale. Chiuta wati waparanye viwangwa vya awo ŵakureka kumopa. Iwo ŵati ŵakhozgeke soni, pakuti Chiuta waŵapata.

⁶Inya, mphanyi kwafika kuthaskika kwa Israele kwakufumira ku Ziyoni! Para Chiuta wakuwezgera mauweme ku ŵanthu ŵakhe, Yakhobe wati wasekerere, Israele wati wakondwe.