Read new_tumbuka_bible MaSalimo 55 Bible Online

MaSalimo 55 - new_tumbuka_bible bible

MaSalimo 55

¹Kwa uyo wakwimbiska sumu: wimbire bango. Sumu ya Davide. Mwe Chiuta, tegherezgani khutu kuti mupulike lurombo lwane. Mungabisamanga chara para nkhupereka maŵeyerero ghane.

²Mundipulikizge ndipo mundizgore. Ndatondeka chifukwa cha visuzgo vyane. Ndatimbanizgika nadi,

³chifukwa ŵarwani ŵane ŵakundofya, ŵanthu ŵaheni ŵakundizotofya. Pakuti ndiwo ŵakundiŵika mu visuzgo, ndipo na ukari ŵakunditinkha kwambula kureka.

⁴Mtima wane ukupulika kuŵinya kukuru, ndipo vyakofya vya nyifwa vyandiwira.

⁵Wofi na chitenthe vyandizira ine, ndipo chofyo chandibenekelera.

⁶Ntheura nkhuti, “Ndiŵenge na mapapindo nga ndi njiŵa, mphanyi ndawurukira kutali na kupumula.

⁷Inya mphanyi ndayingayinga kutali, na kuya kakhara ku mapopa.

⁸Mphanyi nkhenda luŵiro kuya kasanga pakubisamapo mphepo yikari ya chimphupuru.”

⁹Mwe Fumu, pankhurani ivyo ŵakunozgera kuchita, ndipo timbanizgani ivyo ŵakuyowoya, chifukwa nkhuwona chivulupi na zawe mu msumba.

¹⁰Muhanya na usiku, ŵakuyingisuka mu malinga ghakhe zingirizge, ndipo ubendezi na suzgo vili mukati mwakhe.

¹¹Mukati mu msumba mwanangika chomene, ndipo mu ŵagurwe ŵakhe muli kutindiŵizgirana pasi na uryarya.

¹²Waŵenge murwani wane uyo wakunditombozga, mphanyi ndanguzizipizga. Waŵenge wachimphindikwa wane uyo wakundisunjizga, mphanji ndangubisama.

¹³Kweni ndiwe, wa nthanga yane, wa munyane, wa mubwezi wane wakumanyikwa.

¹⁴Tikadumbirananga makani ghaweme pamoza, ndipo tikasoperanga lumoza mu Nyumba ya Chiuta.

¹⁵Imwe Chiuta, zomerezgani kuti nyifwa yiŵabuchizge waka. Rekani ŵarute ŵamoyo ku dindi, pakuti uheni uli mu nyumba zawo na mu mitima yawo.

¹⁶Kweni ine nkhuromba kwa Chiuta ndipo FUMU yiti yindithaskenge.

¹⁷Na mise, na mulenje ndiposo na muhanya pakati, nkhudandaula na kutengera ndipo iyo wati wapulike mazgu ghane.

¹⁸Wati wathaske umoyo wane ku nkhondo yeneiyo nkhurwa, chifukwa ŵanthu ŵanandi ŵanozgeka kuti ŵarwe nane.

¹⁹Chiuta mweneuyo wakukhara pa chizumbe chakhe kufuma papo kale wati wapulike na kuŵayuyura, chifukwa iwo kuti ŵakusunga marango chara nesi kopa Chiuta.

²⁰Mubwezi wane wakawuska woko lakhe, kuti watimbe ŵabwezi ŵakhe, wakaswa phangano lakhe.

²¹Mazgu ghakhe ghakaŵa ghatechi nga mafuta, ndipouli mu mtima wakhe mukaŵa vya nkhondo pera. Mazgu ghakhe ghakaŵa ghatechi nadi nga mafuta ndipouli wakasorora malupanga.

²²Thula kwa FUMU vyakwenjezga vyako, ndipo yiti yikufighilire. Yiti yizomerezgenge chara kuti munthu murunji wasuzgike kwa muyirayira.

²³Kweni imwe, Mwe Chiuta, muti muŵaponye mu dindi lakunyang'amira. Ŵanthu awo ŵakuthiska ndopa na ŵapusikizgi, kuti ŵakwaniskenge mazuŵa ghawo nanga mphakatikati chara. Kweni ine nditi ndigomezge mwa imwe.