Read new_tumbuka_bible MaSalimo 56 Bible Online

MaSalimo 56 - new_tumbuka_bible bible

MaSalimo 56

¹Kwa uyo wakwimbiska sumu. Kwakuyana na kimbiro ka sumu yakuti: Nkhunda yadeka pa makuni mu nguyi ya kutali. Salimo la Davide la mtundu wa Mikitamu, para ŵaFilisiti wakamutorera ku Gati. Mwe Chiuta, mundilengere lusungu, chifukwa ŵanthu ŵakundikandakanda. Ŵarwani ŵakundinyekezga zuŵa lose.

²Ŵarwani ŵane ŵakundikandakanda zuŵa lose, chifukwa ŵanthu ŵanandi ŵakukomana nane mwakujikuzga.

³Para ndachita wofi, nkhugomezga mwa imwe.

⁴Nkhurumba Chiuta chifukwa cha mazgu ghakhe Nkhugomezga Chiuta kwambula kopa. Kasi munthu wangachita nane vichi?

⁵Zuŵa lose la msuma ŵarwani ŵane ŵakupenjerera kutimbanizga chakurata chane. Maghanoghano ghawo ghakulimbana na ine kuti ŵandichitire uheni.

⁶Ŵakuwungana pamoza na kundikhazga, ndipo ŵakundiŵenda umo nkhwenda. Iwo ŵakukhumba kundikoma.

⁷Ntheura muŵalange chifukwa cha chinthu chiheni icho ŵachita. Mwe Chiuta, ŵanthu aŵa muŵakwiyire na kuŵaparanya.

⁸Imwe mwawona umo ŵakundibwankhulira ine, ndipo mukumanya unandi wa masozi ghane. Kasi vyose ivi vindalembeke mu buku linu?

⁹Penepapo ndipo ŵarwani ŵane ŵati ŵawerere nyuma, mu zuŵa ilo nkhuromba kwa imwe. Icho nkhumanya nchakuti Chiuta wali pamoza nane.

¹⁰Nkhurumba Chiuta chifukwa cha mazgu ghakhe. Nkhurumba FUMU chifukwa cha mazgu ghakhe.

¹¹Nkhugomezga Chiuta kwambula kopa. Kasi munthu wangachita nane vichi?

¹²Mwe Chiuta, nkhwenera kufiska ivyo ndapangana kwa imwe. Nditi ndipereke sembe zakumuwongerani imwe.

¹³Pakuti mwathaska umoyo wane ku nyifwa. Inya, mwakhozga malundi ghane kuti ndireke kuwa, mwakuti ndendenge pa maso pa Chiuta mu ungweru uwo ukuŵalira ŵamoyo.