Read new_tumbuka_bible MaSalimo 59 Bible Online

MaSalimo 59 - new_tumbuka_bible bible

MaSalimo 59

¹Kwa uyo wakwimbiska sumu kwakuyana na kimbiro ka sumu yakuti: Mureke kuparanya. Salimo la Davide la mtundu wa Mitikamu para Sauli wakatuma ŵanthu kukakhazga pa nyumba ya Davide kuti wamukome. Mwe Chiuta wane, ndithaskani ku ŵarwani ŵane. Ndivikirirani ku awo ŵakundiwukira.

²Mundithaske ku awo ŵakuchita uheni, ndipo mundiponoske ku awo ŵakuthiska ndopa.

³Wonani, iwo ŵakundikhazga kuti ŵandikome. Vinkhara vyakofya navyo vikuwungana kuti vimikane nane. Mwe FUMU, kuti nchifukwa cha majuvyo ghane panji kwananga kwane chara.

⁴Nangauli ndilije kwananga, iwo ŵakuchimbira kunozgekera nkhondo. Imwe wukani mwize kandovwire, ndipo muwone!

⁵Mwe FUMU, Chiuta Mwenenkhongono zose, ndimwe Chiuta wa Israele. Wukani kuti mulange mafuko ghose. Mungarekangapo na yumoza chara wa ŵanthu ŵaryarya na awo kwata uheni.

⁶Ŵakuweraso mise yiliyose ŵakubwentha nga ndi ncheŵe, na kuyingayinga waka mu msumba.

⁷Awo ŵali apo, ŵakubwebweta waka, na kupanga chiwawa, chifukwa mu maghanoghano ŵakuti, “Ndi njani uyo wati watipulike?”

⁸Kweni imwe, Mwe FUMU, mukuŵaseka, imwe mukupepura mafuko ghose.

⁹Imwe nkhongono zane, maso ghane ghali pa imwe, chifukwa imwe Mwe Chiuta, ndimwe linga lane.

¹⁰Chiuta wane wizamkundipokerera chifukwa ngwa chisungusungu. Chiuta wane wati wazomerezge kuti ndiwone ŵarwani ŵane ŵakuthereskeka.

¹¹Mungaŵakomanga chara, mzire ŵanthu ŵane ŵaruwe. Kweni muŵambininiske na nkhongono zinu ndipo muŵathereske, Mwe Fumu, chiskango chithu.

¹²Ŵawire mu kujikuzga kwawo chifukwa cha kwananga kwa mu mlomo wawo, na mazgu gha pa mlomo wawo. Chifukwa chakuti ŵakutemba ndipo ŵakuyowoya utesi.

¹³Muŵamare na ukari winu. Muŵamare kuti ŵareke kuwonekaso. Ŵanthu ŵamanyenge kuti Chiuta ndiyo wakuwusa pa Yakhobe kuya kafika ku mphererekezgo za charu.

¹⁴Ŵakuweraso mise yiliyose, ŵakubwentha nga ndi ncheŵe na kuyingayinga waka mu msumba.

¹⁵Ŵakwendendeka kupenja chakurya, ndipo ŵakuwuruma usange ŵalije kukhuta.

¹⁶Kweni ine ndimbenge sumu ya kuthuwuska nkhongono zinu. Na mulenje nditi ndimbenge mwakuchemerezga, sumu yakurumba chisungusungu chinu.

¹⁷Imwe nkhongono zane, nditi ndimwimbiraninge sumu za kumurumbani chifukwa imwe, Mwe Chiuta, ndimwe linga lane. Ndimwe Chiuta mweneuyo wakundirongora chisungusungu.