Read new_tumbuka_bible MaSalimo 60 Bible Online

MaSalimo 60 - new_tumbuka_bible bible

MaSalimo 60

¹Kwa uyo wakwimbiska sumu kwakuyana na kimbiro ka sumu ya Shushani Eduti. Salimo la Davide la mtundu wa Mikitamu la kusambizgira, para iyo wakarwa nkhondo na ŵaAramu Naharayimu na ŵaAramu zoba ndipo para Yowabu pakuwerako wakakoma ŵaEdomu 12,000 mu Dambo la Muchere. Mwe Chiuta, mwatitaya ise, mwabwangandula chivikiriro chithu. Mwatikaripira nadi, mutiwezgeremo nga ndi mura tikaŵira.

²Mwasunkhunya charu na chindindindi, ndipo mwachiparura. Nozganimo mwakuparuka, pakuti lichali kusunkhunyika.

³Mwachita kuti ŵanthu ŵinu ŵasuzgike chomene. Mwatimweska vinyo la chilango, leneilo latiloŵezga.

⁴Mwaŵajinthira ndembera awo ŵakumopani imwe, mwakuti ŵachimbilireko kuti ŵaphokwe ku mauta gha ŵarwani.

⁵Mutipe kuvivya na nkhongono yinu yikuru na kutizgora, mwakuti ta ŵakutemweka ŵinu tithaskike.

⁶Chiuta wali kuyowoya mu malo ghakhe ghakupatulika kuti, “Nditi ndigaŵe charu cha Shekemu na kukondwa, ndipo nditi ndigaŵizge dambo la Sukoti.

⁷Gileyadi ngwane, Manase nayo ngwane. Efurayimu wali nga ndi chipewa chane cha kundivikirira. Yuda wali nga ndi nthonga yane ya ufumu.

⁸Mowabu wali nga ndi chiŵiya chane chakugezeramo. Pa Edomu ndipo pakuŵika skapato zane. Nkhuchemerezga mwa kuvivya pa Filisitiya.”

⁹Ndi njani uyo wati wanditorere ku msumba uwo uli na linga? Ndi njani uyo wati wandirongozgere ku Edomu?

¹⁰Mwe Chiuta, kasi mulije kutitaya ndimwe chara? Mwareka kuruta na ŵasilikari ŵithu ndimwe Chiuta.

¹¹Taŵeya, tovwirani kwimikana na ŵarwani ŵithu, pakuti wovwiri wa munthu ngwawakawaka.

¹²Para Chiuta wali pamoza nase, tamkurwa nkhondo na chikanga. Iyo ndiyo wamkuŵakandirizgira pasi ŵarwani ŵithu.