Read new_tumbuka_bible MaSalimo 62 Bible Online

MaSalimo 62 - new_tumbuka_bible bible

MaSalimo 62

¹Kwa uyo wakwimbiska sumu. Kurondezga kimbiro ka Yedutuni. Salimo la Davide. Mtima wane ukulindizga Chiuta wane mwachisisi, chiponosko chane chikufumira kwa iyo.

²Iyo yekha ndiyo jarawe lane na chiponosko chane, iyo ndiyo linga lane, kuti ndisunkhunyiskike chara.

³Kasi muti mumuwukirenge munthu mpaka pauli, kasi mose mumuwiskire pasi, nga ndi chiliŵa chakusunkhunyika, panji nga ndi chimati chakusendemuka?

⁴Iwo ŵakupangana kuti ŵamufumyepo pa malo ghakhe ghakuzirwa, Ŵakutemwa kuyowoya mautesi. Ŵakutumbika na milomo yawo, kweni mu mitima yawo ŵakutemba.

⁵Pakuti mtima wane ukulindizga Chiuta wane pera mwachisi, pakuti chigomezgo chane chikufumira kwa iyo.

⁶Iyo yekha ndiyo jarawe lane na chiponosko chane, linga lane, kuti nditi ndisunkhunyiskike chara.

⁷Kuthaskika kwane na nchindi zane vili kwa Chiuta, Chiuta ndiyo jarawe lane, na chiphokwero chane.

⁸Imwe mwa ŵanthu, gomezgani mwa iyo nyengo zose. Muphalirani vyose ivyo vili mu mitima yinu, pakuti Chiuta ndiyo chiphokwero chithu.

⁹Ŵanthu ŵapasi ndi muvuchi waka, ŵanthu ŵapachanya nawo nkhanthu chara. Wose pamoza mbakupepuka pa sikelo, mbapepu kuruska na muvuchi wuwo.

¹⁰Mureke kugomezga kuti mbembe yingamovwirani, mureke kugomezga kuti vyakwiba vili na chandulo., Mureke kuŵikapo mtima pa vyuma, para vikwandana.

¹¹Para Chiuta wayowoya kamoza, ine nkhupulika kaŵiri kuti, “Imwe mwe chiuta ndimwe ŵankhongono.”

¹²Ndipo imwe Mwe Fumu, ndimwe wa chisungusungu, nadi imwe mukumupa munthu njombe yakuyana na milimo yakhe.