Read new_tumbuka_bible MaSalimo 66 Bible Online

MaSalimo 66 - new_tumbuka_bible bible

MaSalimo 66

¹Kwa uyo wakwimbiska sumu. Sumu. Salimo. Murumbani Chiuta, pakuchemerezga mwakukondwa, imwe mwa ŵanthu mose ŵa mu charu cha pasi.

²Yimbani sumu zakurumba zina lakhe, mumurumbe mwa nchindi.

³Mumuphalire Chiuta kuti, “Milimo yinu njakuzizwiska chomene. Nkhongono zinu nzikuru chomene, mwakuti ŵarwani ŵinu ŵakumugwadirani na wofi.

⁴Ŵanthu wose ŵa mu charu ŵakumusopani imwe. Ŵakwimba sumu zakumurumbani imwe, ŵakwimba sumu za kurumba zina linu.”

⁵Zaninge muwone milimo iyo Chiuta wachita. Milimo yakhe mukati mu ŵanthu njakuzizwiska.

⁶Wakazgora nyanja kuŵa charu chomizo, ŵanthu ŵakenda pasi pa kwambuka mronga. Penepapo tikakondwera mwa iyo.

⁷Iyo wakuwusa na nkhongono kwa muyirayira, ndipo maso ghakhe ghakuwona mafuko ghose gha ŵanthu. Ŵanthu ŵa chigaruka ŵareke kujikwezga.

⁸Chindikani Chiuta withu, Mwe mwa ŵanthu, mazgu ghakumurumba iyo ghapulikikwe.

⁹Iyo watisunga ise kuŵa ŵamoyo, walije kuzomerezga kuti malundi ghithu ghateremuke.

¹⁰Mwe Chiuta, mwatipima. Imwe mwatiyezga nga ndi umo siliva likuyezgekera na moto.

¹¹Imwe mukatinjizga mu ukonde wa ŵarwani, ndipo mukaŵika katundu wa visuzgo pa ise.

¹²Mukazomerezga ŵarwani kukanda pa mitu yithu. Tikasorota mu moto na mu maji. Ndipouli mwiza nase ku malo ghakuthaskikirako.

¹³Nditi ndize mu nyumba yinu na sembe zakocha. Nditi ndifiske mapangano ghane kwa imwe,

¹⁴vyeneivyo nkhayowoya na mlomo wane, ndiposo ivyo nkhapangana para nkhaŵa mu visuzgo.

¹⁵Nditi ndipereke kwa imwe sembe zakocha za nyama yakununa, na sungu la sembe yakocha ya mberere zanarume. Nditi ndipereke sembe ya nkhambako na mbuzi.

¹⁶Zaninge mupulike, mose imwe mukusopa Chiuta, nditi ndimukonkhoskerani ivyo iyo wandichitira.

¹⁷Nkhachemerezga kwa iyo, ndipo nkhamurumba na lulimi lwane.

¹⁸Ndiŵenge wakuzomerezga kwananga mu mtima wane, Fumu mphanyi yikandipulika chara.

¹⁹Kweni nadi Chiuta wandipulika, wategherezga ku mazgu gha lurombo lwane.

²⁰Watumbikike Chiuta, chifukwa walije kukana lurombo lwane, nesi kufumyako chisungusungu chakhe kwa ine.