Read new_tumbuka_bible MaSalimo 68 Bible Online

MaSalimo 68 - new_tumbuka_bible bible

MaSalimo 68

¹Kwa uyo wakwimbiska sumu. Salimo la Davide. Sumu. Chiuta wawuke, ŵarwani ŵakhe ŵambininiskike, awo ŵakumutinkha ŵachimbire panthazi pakhe.

²Muŵachimbizgire kutali, nga ndi umo josi likuputikira kutali. Ŵanthu ŵaheni ŵamare petu panthazi pa Chiuta, nga ndi umo phula likusongonokera pa moto.

³Kweni ŵarunji ŵakondwenge, ŵasekerere panthazi pa Chiuta, ndipo ŵazaye na chimwemwe.

⁴Mwimbirani Chiuta, yimbani sumu za kurumba zina lakhe. Tumphuskirani sumu kwa iyo, mweneuyo wakugara pa maŵingo. Zina lakhe ndi FUMU, mukondwere panthazi pakhe.

⁵Wiske wa ŵalanda, nkhoswe ya vyokoro, ndi Chiuta mu malo ghakhe ghakupatulika.

⁶Chiuta wakuŵapa ŵasokwano malo ghakukharamo, wakuŵafumiskira ku usakati awo ŵali mu gadi. Kweni awo ŵakumugarukira, ŵakukhara mu charu cha chinkhamwa.

⁷Mwe Chiuta, para mukafuma kuŵadangirira ŵanthu ŵinu, para mukendanga mu mapopa mura,

⁸charu chikasunkhunyika, mitambo yikarokweska vura, panthazi pinu imwe Chiuta, nanga ndi Phiri la Sinayi likasunkhunyika, panthazi pinu imwe Chiuta, Chiuta wa Israele.

⁹Mwe Chiuta, mukarokweska vura yinandi, mukachiwezgeramoso charu chinu chakuguga.

¹⁰Ŵanthu ŵinu ŵakasanga malo gha kukharamo, Mwe Chiuta, mu uweme winu mukaŵalera ŵasokwano.

¹¹Fumu ndiyo yikulangula, Wumba wa awo ŵakapharazga makani ghaweme, ukaŵa ukuru:

¹²“Ŵakaronga na viwuru vya nkhondo, ŵakachimbirachimbira,” ŵanakazi nawo ku kaya ŵakugaŵana vyakuskogha,

¹³nangauli ŵakukhara pakati pa vitupa vya mberere, kweni sono ŵali na siliva na golide nga ndi njiŵa iyo yadikiskika na mapapindo ghakhe.

¹⁴Para Mwenenkhongono zose wakambininiska ŵakaronga kwenekura, chiwuvi chikaŵa pa Phiri la Zalimoni.

¹⁵Iwe phiri likuru, Phiri la Bashani, iwe phiri la vikurupati vinandi, iwe Phiri la Bashani.

¹⁶Iwe phiri la vikurupati vinandi, kasi ukulaŵiskilachi na sanje, pa phiri ilo Chiuta wali kusankha kuti wakharengepo? Nadi, FUMU yiti yikharengepo kwa muyirayira.

¹⁷FUMU yikiza na magareta gha nkhongono, vikwivikwi kufumira ku Phiri la Sinayi kwiza ku malo ghakupatulika.

¹⁸Para mukakwerera kuchanya ku phiri, mukatora awo ŵakaŵa mu umikori. Mukapokera vyawanangwa ku ŵanthu, nanga nkhu awo ŵakaŵa ŵakugaruka, mwakuti imwe FUMU Chiuta mukhare kwenekura.

¹⁹Yirumbike FUMU Chiuta, Muponoski withu, mweneuyo wakuyegha katundu withu zuŵa na zuŵa.

²⁰Chiuta withu ndi Chiuta wakuponoska. Kwa iyo FUMU Chiuta ndiko tikuthaskikira ku nyifwa.

²¹Kweni Chiuta wati watekete mitu ya ŵarwani ŵakhe, mitu ya awo ŵakwenda mu nthowa zawo ziheni.

²²FUMU yikati, “Nditi ndiŵawezgeko ŵarwani ŵinu ku charu cha Bashani, nditi ndiŵawezgeko ku zindimba za nyanja,

²³kuti mugeze malundi ghinu mu ndopa, ndipo ncheŵe nazo zimyangeko ndopa za ŵarwani ŵinu.”

²⁴Mwe Chiuta, ungano wa ŵanthu ŵinu ŵakwenda mwa nchindi ukuwoneka, kwenda kwa Chiuta wane, Karonga wane, kuya kanjira mu nyumba yakhe.

²⁵Ŵimbi ŵa zisumu ŵali munthazi, ŵakulizga viding'indi ŵali kunyuma Pakati pa iwo pali ŵamwali ŵakulizga visekese.

²⁶“Rumbani Chiuta mu mpingo ukuru, rumbani FUMU, imwe ŵa mphapu ya Israele.”

²⁷Panthazi pawo pali Benjamini, muchoko wa wose, pamanyuma pali nduna za charu cha Yuda, ndiposo na nduna za Zebuloni, na za Nafutali.

²⁸Wunganyani nkhongono zinu, Mwe Chiuta, rongorani nkhongono zinu, Mwe Chiuta, mwaŵeneimwe muli kutichitira vinthu vikuru.

²⁹Chifukwa cha Nyumba yinu ku Yerusalemu, ŵakaronga ŵakwiza na vyawanangwa kwa imwe.

³⁰Chenyani vikoko ivyo vikukhara mu matete, mskambo wa nkhambako pamoza na tunkhambako, vya ŵamitundu. Kandirizgirani pasi awo ŵakudokera vyakuskogha, mbininiskani mafuko agho ghakutemwa kurwa nkhondo.

³¹Ŵakazembe ŵamkwiza kufuma ku Eguputo, ŵa ku Etiyopiya maluŵiro ŵamkuwuska mawoko ghawo kupokerera Chiuta.

³²Imwe maufumu gha charu, yimbirani Chiuta, yimbani sumu zakurumba Fumu.

³³Yimbirani uyo wakugara pa mitambo, mitambo ya mwaka na mwaka, uyo wakutuma mazgu ghakhe gha nkhongono.

³⁴Pharazgani kuti Chiuta ngwa nkhongono, uyo ufumunkhuru wakhe uli pa Israele, uyo nkhongono zakhe zili mu mlengalenga.

³⁵Imwe Chiuta ndimwe ŵakofya, mu malo ghinu gha ghakupatulika. Chiuta wa Israele, wakupereka mazaza na nkhongono ku ŵanthu ŵakhe. Chiuta watumbikike!