Read new_tumbuka_bible MaSalimo 69 Bible Online

MaSalimo 69 - new_tumbuka_bible bible

MaSalimo 69

¹Kwa uyo wakwimbiska sumu. Kwakuyana na kimbiro ka sumu yakuti “Maluŵa gha Lile.” Salimo la Davide. Mwe Chiuta, ndiponoskani, pakuti maji ghafika na mu singo.

²Nkhubira mu ndimba ya mathakalimbwa, umo mulije na pakwimapo. Ndabira mu ndimba ya maji, ndipo majigha ghakundibizga.

³Vyalema na kulira kwane, chigoromiro chane chomira. Maso ghane nagho ghakulolotera, apo nkhulindirira Chiuta wane.

⁴Ŵanthu awo ŵakunditinkha kwambula chifukwa, mbanandi kuruska masisi gha kumutu wane. Mbankhongono ŵarwani ŵane awo ŵakukhumba kundikoma, ŵeneawo ŵakunditetezgera utesi. Nkhuchichizgika kuwezga, icho kuti nkhiba chara.

⁵Mwe Chiuta, mukumanya kupusa kwane, kwananga kwane, nkhwakubisika kwa imwe chara.

⁶Mwe FUMU, Chiuta Mwenenkhongono zose, mungazomerezganga kuti awo ŵakugomezga mwa imwe, ŵakhozgeke soni chifukwa cha ine. Mwe Chiuta wa Israele, mungazomerezganga chara kuti awo ŵakumupenjani, ŵayuyurike chifukwa cha ine.

⁷Pakuti ine ndatombozgeka chifukwa cha imwe, mwakuti chisko chane ncha soni pera.

⁸Ndazgoka mulendo ku ŵabali ŵane, ndaŵa wakupanjwa ku ŵana ŵa kwa mama.

⁹Phamphu ilo ndili nalo pa nyumba yinu yandikoma, ndipo visunjizgo vya awo ŵakumunyozani vyandigundizga ine.

¹⁰Para nkhujiyuyura na kuziŵizga kurya, chikuŵa chisunjizgo kwa ine.

¹¹Para nkhavwara chigudulu, nkhazgoka chimuhoyere kwa iwo.

¹²Awo ŵakukhara pa chipata ŵakundinena, ndipo ŵaloŵevu ŵakwata sumu zakunena ine.

¹³Kweni ine nkhuromba kwa imwe, Mwe FUMU, pa nyengo yakwenerera. Mu uzari wa chisungusungu chinu, Mwe Chiuta, mundizgore. Na wovwiri winu wakugomezgeka,

¹⁴mundithaske na kundifumya mu mathakalimbwa, mungazomerezgenga chara kuti ndibire. Mundithaske ku ŵarwani ŵane, na ku ndimba ya maji.

¹⁵Mungazomeranga kuti maji gha chigumura ghandibizge, panji ndimba yindimire, panjiso dindi lindiwundire.

¹⁶Mwe FUMU, mundizgore, chifukwa chisungusungu chinu nchiweme. Tegherezgani kwa ine, kwakuyana na chiwuravi chinu chikuru.

¹⁷Mureke kubisa chisko chinu kwa nda muteŵeti winu, mundizgore luŵiro, pakuti ndili mu suzgo.

¹⁸Sendererani kufupi na ine kuti mundiwombole, ndithaskani ku ŵarwani ŵane.

¹⁹Mukumanya umo ŵakundisunjizgira, ŵakundikhozgera soni na kundiyuyulira. Ŵarwani ŵane wose mukuŵamanya.

²⁰Mtima wane wasweka na kutombozgeka, mwakuti ndathika lusoko. Nkhapenjerera ŵanji ŵakundichitira chitima, kweni kukaŵavye na yumoza. Nkhapenja ŵanji ŵakundisanguruska, kweni nkhasangapo na yumoza wuwo chara.

²¹Ŵakandipa nduru kuti kuŵenge kurya kwane, ŵakandipa vinyo la kusasa kuti ndimwe.

²²Vyakurya ivyo ŵakharika panthazi pawo, vizgoke kuŵa chipingo. Chiphikiro cha sembe zawo chiŵe musampha.

²³Maso ghawo ghaburumutizgike, kuti ŵareke kuwona, viwuno vyawo vimbwambwanthe kwambula kurekezga.

²⁴Pungulirani ukari winu pa iwo, rekani kukwiya kwinu kugolere pa iwo.

²⁵Malo ghawo ghakukharapo ghazgoke mapopa, paŵavye munthu wakukhara mu mahami ghawo.

²⁶Iwo ŵakuyuzga uyo imwe mwamutimba, uyo imwe mwamupweteka iwo ŵakurutirizga kumusuzga.

²⁷Sazgiraniko chilango pachanya pa chilango, mureke kuŵagowokera chara.

²⁸Muŵasisitemo mu Buku la ŵamoyo, ŵareke kulembeka pamoza na ŵarunji.

²⁹Ine ndili mu suzgo na mu vyakuŵinya, Mwe Chiuta, zomerani chiponosko chinu, chindikwezgere muchanya.

³⁰Nditi ndirumbe zina la Chiuta pakumwimbira sumu, nditi ndimuchindike na kumuwonga.

³¹Ichi chiti chikondweske FUMU, kuruska kupereka sembe ya ng'ombe, panji nkhambako ya msuma.

³²Ŵakusuzgika ŵawone ivi ndipo ŵakondwenge, mitima yinu yiweremo, imwe mukupenja Chiuta,

³³Pakuti FUMU yikuŵapulika ŵakavu, kuti yikuyuyura ŵakhe awo mbakukakika chara.

³⁴Kuchanya na charu cha pasi vimurumbe iyo, zinyanja nazo na vyose ivyo vikwenda mwenemumo.

³⁵Pakuti Chiuta wathaskenge Ziyoni, wati wazengaso misumba ya charu cha Yuda. Ŵateŵeti ŵakhe ŵati ŵakharenge mwenemumo, na kuchizgora kuŵa charu chawo.

³⁶Ŵana ŵa ŵateŵeti ŵakhe ŵati ŵachiharenge, ndipo awo ŵakutemwa zina lakhe, ŵati ŵakhare mwenemumo.