Read new_tumbuka_bible MaSalimo 7 Bible Online

MaSalimo 7 - new_tumbuka_bible bible

MaSalimo 7

¹Salimo la Davide la mtundu wa Shigayoni ilo wakimbira FUMU pakuyowoya vya Etiyopiya muBenjamini. Mwe FUMU, Chiuta wane, mwa imwe ndimo nkhubisamamo, ndithaskani na kundiponoska ku wose awo ŵakundidikizga.

²Mzire wanditwazure nga ndi nkharamu, ŵandiguzire kutali kwambula munthu wakundithaska.

³Mwe FUMU Chiuta wane, usange ndachita vinthu ivi: usange ndananga mawoko ghane na uheni,

⁴usange ndamuwezgera uheni mubwezi wane, panji kuskogha vinthu vya murwani wane kwambula chifukwa,

⁵ipo rekani murwani wane wandichimbilire na kundikora, rekani wakandirizgire pasi umoyo wane, na kundigoneka pasi mu fuvu.

⁶Mu ukari winu, Mwe FUMU, wukani. Tumphukirani muchanya, mwimikane na ukari wa ŵarwani ŵane. Wukani, Mwe Chiuta wane. Imwe mwimika ŵeruzgi ŵakunyoroka.

⁷Rekani ŵanthu ŵa mitundu yose ŵawungane kumuzingirizgani imwe, muŵawusire pa chizumbe chinu kuchanya.

⁸FUMU ndiyo yikweruzga ŵamitundu. Munderuzge, Mwe FUMU, kwakuyana na urunji wane, na umo ndiliri wambula kafukwa.

⁹Imwe Chiuta Murunji, imwe mukusanda maghanoghano na mitima ya ŵanthu marizgani uheni wa ŵanthu ŵakwananga, ŵarunji muŵakhozge.

¹⁰Chiuta ndi nguru yane, uyo wakuthaska awo mbakunyoroka mu mtima.

¹¹Chiuta ndiyo mweruzgi murunji, ndi uyo wakurongora ukari wakhe zuŵa na zuŵa.

¹²Usange munthu wakureka kung'anamuka mu mtima, Chiuta wati wanore lupanga lwakhe, wati wakweŵe uta wakhe.

¹³Wanozga mahomwa ghakhe agho ghakukoma, wanozgera mivwi yakhe ya moto.

¹⁴Munthu muheni wakughanaghana viheni pera, wakuzura na uryarya na kubaba upusikizgi.

¹⁵Wakujima mbuna kuŵa yakuzonthoka, kweni iyomwene ndiyo wakuwamo mu mbuna iyo wakajima.

¹⁶Machitiro ghakhe ghaheni ghakumuwerera iyomwene, nkhaza zakhe zikumuwerera yekha.

¹⁷Nditi ndiwonge FUMU chifukwa cha urunji wakhe, nditi ndiyimbe sumu zakurumba zina la FUMU, Chiuta Chikurukuru.