Read new_tumbuka_bible MaSalimo 71 Bible Online

MaSalimo 71 - new_tumbuka_bible bible

MaSalimo 71

¹Mwa imwe, Mwe FUMU, ndimo nkhuphokweramo, mungazomerezga chara kuti ndilengeskeke.

²Mu urunji winu mundithaske na kundiponoska, tegherezgani khutu linu ndipo mundithaske,

³Muŵe jarawe lane lakuphokweramo, linga lakukhora la kundiponoska, pakuti ndimwe nadi jarawe lane na linga lane.

⁴Mwe Chiuta wane, ndithaskani ku ŵanthu ŵaheni, ku woko la ŵanthu ŵambula urunji na ŵankhaza.

⁵Pakuti imwe, Mwe FUMU Chiuta, ndimwe nkhugomezga, ndimwe nkhutamira, kufumira ku wanichi wane.

⁶Nkhweghamira kwa imwe kwamba ku kubabika kwane. Imwe ndimwe mukandifumya mu nthumbo ya amama. Nditi ndimurumbani imwe kwambula kureka.

⁷Ndili nga ndi chinthu chakuzukumiska ku ŵanandi, kweni imwe ndimwe chiphokwero chane chakukhora.

⁸Mlomo wane wazura na marumbo kwa imwe, ndiposo na kumuchindikani zuŵa lose.

⁹Munganditayanga chara mu nyengo ya uchekuru wane. Mungandisidanga chara para nkhongono zane zamara.

¹⁰Pakuti ŵarwani ŵane ŵakundinena, awo ŵakujoŵerera umoyo wane ŵakundichitira wupu.

¹¹Iwo ŵakuti, “Chiuta wamureka. Murondezgani na kumukora, pakuti kulije na yumoza wakumuthaska.”

¹²Mwe Chiuta mungaŵanga kutali na ine chara, Mwe Chiuta wane, mwendeske kwiza kandovwira.

¹³Ŵanthu awo ŵakunditundura, ŵalengeskeke na kumara petu. Awo ŵakupenja kundipweteka, ŵayuyurike na kulengeskeka.

¹⁴Kweni ine nditi ndigomezge imwe nyengo zose, nditi ndimurumbani imwe kaŵiri.

¹⁵Nditi ndipharazgenge milimo yinu yirunji, machitiro ghinu gha ya chiponosko zuŵa lose, nangauli unandi wawo ukuruska umo ine nkhumanyira.

¹⁶Nditi ndize na kupharazga milimo yikuru ya FUMU Chiuta. Nditi ndirumbe urunji winu, urunji wa imwe pera.

¹⁷Mwe Chiuta, kufuma ku wanichi wane, imwe ndimwe muli kundisambizga, ndipo na sono ndichali kupharazga milimo yinu yakuzizwiska.

¹⁸Nangauli ndachekura ndipo ndili na mbuha, Mwe Chiuta, mureke kundireka. Ine ndisuke ndipharazge nkhongono zinu ku miwiro yose iyo yikwiza.

¹⁹Mwe Chiuta, nkhongono yinu na urunji winu, vikufika mpaka ku mtambo kutali. Kasi ndi njani wakuyana na imwe, Mwe Chiuta, mwaŵeneimwe mwachita vinthu vikuru?

²⁰Imwe ndimwe mwachitiska kuti ndiwone visuzgo vinandi, muti muwezgereso umoyo wane. Kufumira ku ndimba za charu na charu, imwe muti mundiwuskeso.

²¹Imwe muti musazgirengepo nchindi zane na kundisanguruskaso.

²²Ine nane nditi ndimurumbani na bango, chifukwa cha kugomezgeka kwinu, mwe Chiuta wane. Nditi ndimurumbani imwe na viding'indi, Mwe Mutuŵa Yura wa Israele.

²³Mlomo wane uti uchemerezge na chimwemwe, para nkhumwimbirani sumu za kurumba. Mzimu wane uwo mwawuwombola, nawoso uti wimbenge.

²⁴Zuŵa lose nditi ndiyowoye za urunji winu wakovwira, pakuti ŵakhozgeka soni na kuyuyurika awo ŵakapenjanga kundipweteka ine.