Read new_tumbuka_bible MaSalimo 72 Bible Online

MaSalimo 72 - new_tumbuka_bible bible

MaSalimo 72

¹Salimo la Solomoni. Mwe Chiuta, mupani karonga winu weruzgi wakunyoroka, mupani mwana wa karonga urunji winu.

²Iyo wati weruzge ŵanthu ŵinu mu urunji, ndiposo ŵanthu ŵinu ŵakavu kwambula kutemwera.

³Mapiri ghaŵape ŵanthu uweme, tumapiri nato tuŵape vipambi vya urunji.

⁴Iyo wavikirire ŵakavu mukati mu ŵanthu, kupereka kuthaskika ku ŵasokwano, na kuparanya awo ŵakutindiŵizgira pasi ŵanyawo.

⁵Iyo wamopaninge imwe umo dazi likuŵalira, umo mwezi ukuŵalira mu mlengalenga, miwiro na miwiro.

⁶Waŵe nga ndi vura iyo yikurokwa pa utheka, nga ndi vura yakuwazga iyo yikurokwa pa charu.

⁷Mu mazuŵa ghakhe, urunji uzare, chimango chiŵe chakuzara mpaka mwezi ureke kuŵala.

⁸Wawusenge kufuma ku nyanja, kuya kafika ku nyanja yinyakhe, kufuma ku mronga mpaka ku mphererekezgo za charu.

⁹Ŵanthu awo ŵakukhara mu mapopa ŵati ŵamulambirenge, ndipo ŵarwani wakhe ŵati ŵamyangenge fuvu.

¹⁰Ŵakaronga ŵa ku Tarishishi na ŵa virwa, ŵizamkupereka mithulo kwa iyo. Ŵakaronga ŵa ku Sheba na ŵa ku Seba, ŵamuyegherenge vyawanangwa.

¹¹Ŵakaronga wose ŵamulambirenge, mafuko ghose ghamuteŵeterenge.

¹²Pakuti wakuthaska ŵakusoŵerwa awo ŵakumuchema, ŵakavu na awo ŵalije munthu wakovwira.

¹³Wali na chiwuravi na awo mbatechitechi na ŵakavu, ndipo wakuthaska awo mbakavu.

¹⁴Wakuwombola umoyo wawo, ku awo ŵakuŵayuzga na awo ŵakuchita chivulupi, pakuti ndopa zawo ndi zakuzirwa chomene panthazi pakhe.

¹⁵Waŵe na umoyo utali karonga, golide la ku Sheba liperekeke kwa iyo. Ŵanthu ŵamurombere kwambula kurekezga, ŵamuromberenge vitumbiko zuŵa lose.

¹⁶Muŵe vyakurya vinandi mu charu, pachanya pa mapiri paŵe vyakumera. Vipambi vyakhe viyane waka na vya ku Lebanoni. Ŵanthu ŵaŵe ŵanandi mu misumba nga ndi utheka wa mu thengere.

¹⁷Zina lakhe likhalirire kwa muyirayira, lumbiri lwakhe lukhalirire nga ndi dazi. Mafuko ghose ghatumbikikire kwizira mwa iyo, ndipo ghamucheme kuti ngwa kutumbikika.

¹⁸Yirumbike FUMU, Chiuta wa Israele, uyo yekha wakuchita vinthu vyakuzukumiska.

¹⁹Zina la FUMU la uchindami lirumbike kwa muyirayira, uchindami wakhe uzure mu charu chose. Ameni! Ameni!

²⁰Uwu ndiwo umaliro wa malurombo gha Davide, mwana wa Yese.