Read new_tumbuka_bible MaSalimo 73 Bible Online

MaSalimo 73 - new_tumbuka_bible bible

MaSalimo 73

¹Salimo la Asafu. Nadi, Chiuta ndi muweme ku awo mbakunyoroka, ku awo mbakutowa mu mtima.

²Kweni ine nkhaŵa pafupi kukhuŵara, malundi ghane ghakaŵa pafupi kuteremuka.

³Pakuti nkhaŵa na sanje na ŵanthu ŵakujikuzga, para nkhawona kuti ŵaheni ŵakusakata.

⁴Iwo kuti ŵakupulika vyakuŵinya chara, mathupi ghawo ngankhongono na ghakututuŵa.

⁵Kuti ŵakuwona visuzgo nga ndi ŵanyakhe chara, kuti ŵakukomwa nga mbanthu ŵanyakhe chara.

⁶Ntheura ŵakujikuzga, nga ndi para ŵavwara majuda, ŵakuvwara nkhaza nga ndi malaya.

⁷Maso ghawo ngakutupa na kututuŵa, mitima ghawo yazura na maghanoghano, ghakuchita uryarya.

⁸Ŵakunyoza ŵanyawo na kuyowoya vinthu viheni, mukujikuzga ŵakufinga vyakutindiŵizgira pasi ŵanyawo.

⁹Iwo ŵakuyowoya za kwimikana na Chiuta kuchanya, ndipo pa charu ŵakuŵereŵeta waka ku waliyose.

¹⁰Ntheura ŵanthu ŵakwiza na kuŵarumba iwo, ndipo ŵakusanga kuti mulije kaheni mwa iwo.

¹¹Ntheura iwo ŵakuti, “Kasi Chiuta wangamanya uli? Kasi Chiuta Chikurukuru wali na mahara?”

¹²Ntheura ndimo ŵaliri ŵanthu ŵaheni, nyengo zose ŵakufwasa, ndipo usambazi wawo nawo ukwandana.

¹³Nadi, kose uku kukaŵa pawaka, pakusungilira mtima wane wambula kwananga, pakugeza mawoko ghane kuwuskapo uheni.

¹⁴Pakuti ine ndakomwa zuŵa lose la msuma, mulenje uliwose nkhulangika.

¹⁵Usange nkhatenge, “Nditi ndiyowoyenge ntheura,” mphanyi ndili wambula kugomezgeka ku muwiro wa ŵana ŵinu.

¹⁶Kweni para nkhaghanaghana na umo ndingapulikiskira ichi, vikawoneka nga ndi mlimo wakuvuska,

¹⁷mpaka nkharuta ku Nyumba ya Chiuta, apo ndipo nkhamanyira umaliro wawo.

¹⁸Nadi mwaŵaŵika mu malo ghakuteremuka, mukachitiska kuti ŵawe pasi kumara petu.

¹⁹Iwo ŵakumara mu kanyengo kachoko waka, ŵakufwirathu waka na wofi.

²⁰Nga ndi maloto pakuwuka waka mu tulo, ntheura ndimo, para imwe, Mwe FUMU, mukuwuka, mukupepurira ivyo ŵaviwonanga.

²¹Para mzimu wane ukakwiyiskika, na kupulika vyakuŵinya mu mtima,

²²nkhaŵa muzereza na wambula kupulikiska, nkhaŵa nga ndi chikoko kwa imwe.

²³Ndipouli, ndili namwe nyengo zose, Imwe mukundikora pa woko lane la maryero.

²⁴Mukundirongozga na visambizgo vyinu, pamanyuma mwizamkundipokerera mu uchindami.

²⁵Kasi ndi njani munyakhe uyo ndili nayo kuchanya, asi ndimwe pera? Pano pasi palije kanthu kanyakhe, ako nkhukakhumba kuruska imwe.

²⁶Thupi lane na mtima wane vingatondeka, Chiuta ndiyo nkhongono ya mtima wane, ndiyo phande lane kwa muyirayira.

²⁷Awo ŵali kutali na imwe, ŵati ŵamarenge petu, Imwe mukuŵamara awo mbambula kugomezgeka kwa imwe.

²⁸Kweni kwa ine, nkhuweme kuŵa pafupi na Chiuta, ndasankha FUMU Chiuta kuŵa chiphokwero chane, mwakuti ndipharazge milimo yinu yose.