Read new_tumbuka_bible MaSalimo 74 Bible Online

MaSalimo 74 - new_tumbuka_bible bible

MaSalimo 74

¹Sumu ya Asafu. Mwe Chiuta, kasi mwatitayirachi kutali kwa muyirayira? Kasi ukari winu ukusunkhira pa ise mberere, za luhari lwinu chifukwa uli?

²Kumbukirani mpingo winu uwo mukagula kale, fuko ilo mukaliwombola kuŵa chiharo chinu. Kumbukirani Phiri la Ziyoni, kweneuko imwe mukakharako.

³Mwize kendera mahami agho ghaŵako kwa muyirayira, ŵarwani ŵapankhura kalikose ako kali mu malo ghinu ghakupatulika.

⁴Ŵarwani ŵinu ŵachemerezga mukati mu malo ghinu ghakupatulika, ŵimikamo vimanyikwiro vyawo kurongora kuti ŵatonda.

⁵Chipata cha kunena, ŵadumulira pasi, nga ndi umo ŵakudumulira makuni mu nguyi.

⁶Mathabwa ghose ghakuŵajika makora, ŵaghadumulira pasi na misompho na nyondo.

⁷Malo ghinu ghakupatulika ŵali kocha na moto na kuwiskira pasi, ŵakazuzga malo agho muli zina linu.

⁸Iwo ŵakuti, “Tiyeni tiŵathereskerethu,” ŵali kocha malo ghose ghakusoperamo Chiuta mu charu.

⁹Vimanyikwiro kuti tikuviwona chara, kulije nanga ndi nchimi yimoza, mulije nanga njumoza mukati mwithu, uyo wakumanya apo ivi vyamkumalira.

¹⁰Mwe Chiuta, kasi ŵarwani ŵithu ŵasunjizgenge mpaka pauli? Kasi ŵanyozenge zina linu kwa muyirayira?

¹¹Kasi nchifukwa uli mukuwezgako woko linu? Nchifukwa uli mwafumbata mawoko ghinu?

¹²Ndipouli, imwe Chiuta, ndimwe karonga wane kufuma papo kale, ndimwe mukwiza na chiponosko mu charu.

¹³Ndimwe mukapatula nyanja na nkhongono zinu, mukateketa mitu ya vinjoka vyakofya vya mu maji.

¹⁴Ndimwe mukaphwanya mitu ya chikoko chakofya cha mu nyanja, ndipo mukachipereka kuŵa chakurya cha vikoko vya mu mapopa.

¹⁵Ndimwe mukajula mbwiwi za maji na tumironga. Mukakamuska mironga yakwenda iyo kuti yikukamuka chara.

¹⁶Muhanya ngwinu, usiku nawo ngwinu, mukimika nyenyezi, mwezi na dazi.

¹⁷Ndimwe muli kwimika mphaka zose za charu, muli kuŵikako chihanya na chifuku.

¹⁸Kumbukani ichi Mwe FUMU, umo murwani wakusunjizgira, umo ŵanthu ŵakupusa ŵakutukira zina linu.

¹⁹Mungaperekanga mzimu wa njiŵa yinu ku vikoko, mungaruwanga kwa muyirayira, umoyo wa ŵanthu ŵinu ŵakavu.

²⁰Kumbukani phangano linu, pakuti malo ghakubisika gha mu charu, ghazgoka ghakuchitiramo vinthu vya nkhaza.

²¹Awo ŵakutindiŵizgikira pasi ŵangakhozgekanga soni chara, ŵakavu na ŵasokwano ŵamurumbani imwe.

²²Wukani, Mwe Chiuta, mujivikirire mwekha, Kumbukani umo ŵakupusa ŵakutukira imwe zuŵa lose.

²³Mureke kurekerera kamphomezi ka ŵarwani ŵinu, kuchemerezga kwa ŵavimphindikwa ŵinu, uko kukukulirakulira kwambula kureka.