Read new_tumbuka_bible MaSalimo 77 Bible Online

MaSalimo 77 - new_tumbuka_bible bible

MaSalimo 77

¹Kwa uyo wakwimbiska sumu kwakuyana na kimbiro ka Yedutuni. Salimo la Asafu. Nkhulira mwakuchemerezga kwa Chiuta, inya nkhuchemerezga kwa Chiuta kuti wandipulike.

²Pa nyengo ya visuzgo nkhupenja Fumu. Usiku wose nkhukwezga mawoko ghane na kuromba kwambula kuvuka. Mtima wane nawo ukukana kusanguruskika.

³Para nkhughanaghana vya Chiuta, nkhutampha mu mtima. Para nkhulanguruka vya iyo, nkhutaya mtima.

⁴Ndimwe mukukora nkhope zane kuti ndireke kugona tulo. Nkhusuzgika chomene rekani nkhutondeka kuyowoya.

⁵Nkhulanguruka na mazuŵa gha kale, nkhukumbuka virimika vya mwaka.

⁶Nkhulanguruka mu mtima wane na usiku. Nkhughanaghana na kujifumba mu mtima wane nkhuti,

⁷“Kasi Fumu yiti yinditayenge nkhanira? Kasi yiŵengeso na lusungu chara?

⁸Kasi chisungusungu chakhe chamalira nkhanira? Kasi mapangano ghakhe ghara ghamara kwa muyirayira?

⁹Kasi Chiuta waruwa kuŵa wa uchizi? Kasi mu ukari wakhe wareka kuŵa wa chisungusungu?”

¹⁰Ntheura nkhuti, “Icho chikundipweteka nchakuti, Chiuta Chikurukuru wasintha machitiro ghakhe.”

¹¹Ndipouli nditi ndikumbuke milimo yinu FUMU. Inya nditi ndikumbuke vyakuzizwiska vyinu vya kale.

¹²Nditi ndilanguruke na milimo yinu yose, ndipo nditi ndighanaghane na milimo yinu ya nkhongono.

¹³Nthowa zinu, Mwe Chiuta, nzakupatulika. Kasi ndi chiuta nju uyo ndi mukuru nga ndi Chiuta withu?

¹⁴Imwe ndimwe Chiuta uyo wakuchita vya kuzizwiska, ndimwe mwarongora nkhongono zinu.

¹⁵Ndimwe mukawombola ŵanthu na nkhongono zinu, ndiwo ŵana ŵa Yakhobe na ŵana ŵa Yosefe.

¹⁶Para maji ghakamuwonani, Mwe Chiuta, inya para maji ghakamuwonani, ghakatenthema, inya ndimba ya maji nayo yikambwambwantha.

¹⁷Maŵingu ghakarokweska vura, mu mlengalenga mukapulikikwa vikhayokhayo, mivwi yinu yikamwetuka kosekose.

¹⁸Kududumira kwa ŵaleza ŵinu kukaŵa mu kavuruvuru. Ŵaleza ŵinu ŵakangweruska charu chose. Charu cha pasi chikambwambwantha na kusunkhunyika.

¹⁹Imwe mukizira pa nyanja, nthowa yinu yili mu nyanja yikuru, ndipouli malwayo ghinu kuti ghakawoneka chara.

²⁰Mukarongozga ŵanthu ŵinu nga ndi mskambo wa mberere kwizira mwa Mozesi na Aroni.