Read new_tumbuka_bible MaSalimo 78 Bible Online

MaSalimo 78 - new_tumbuka_bible bible

MaSalimo 78

¹Sumu ya Asafu. Mwa ŵanthu ŵane, pulikizgani ku visambizgo vyane, tegherezgani mupulike mazgu agho nkhuyowoya.

²Nditi ndiyowoyere mu ntharika, ndiyowoye vya kubisika vya kale.

³Vinthu ivyo tikavipulika na kuvimanya, ivyo ŵasekuru ŵithu ŵakatiphalira.

⁴Kuti titi tivibisenge ku ŵana ŵawo chara, kweni tiŵandulirenge miwiro yinyakhe iyo yikwiza, milimo yakuzirwa na nkhongono ya FUMU, na vya minthondwe ivyo wali kuchita.

⁵Wali kupereka chilayizgo mwa Yakhobe na kwimika dango mu ŵaIsraele, leneilo wakalangulira ŵasekuru ŵithu, kuti ŵasambizge ŵana ŵawo,

⁶mwakuti muwiro unyakhe wa kunthazi uvimanyenge, ŵana awo ŵandababike ndipo iwo nawoso ŵizamkuphalira ŵana ŵawo.

⁷Mwa ntheura ŵana ŵara ŵagomezgenge Chiuta, kwambula kuruwa milimo yakhe, kweni ŵasunge marango ghakhe.

⁸Iwo ŵareke kuŵa nga mbasekuru ŵawo, muwiro wa mutafu na wa chigaruka ura, weneuwo ukaŵa wa mtima unonono, na wambula kugomezgeka kwa Chiuta.

⁹Nangauli ŵaEfurayimu ŵakarweranga mauta, iwo ŵakachimbira pa zuŵa la nkhondo.

¹⁰Iwo ŵakasungilira phangano la Chiuta chara, kweni ŵakakana kwenda kwakuyana na dango lakhe.

¹¹Ŵakaruwa ivyo iyo wakachita, minthondwe iyo wakaŵarongora.

¹²Iyo wakachita vyakuzukumiska panthazi pa ŵasekuru ŵawo, mu charu cha Eguputo, mu chigaŵa cha Zowani.

¹³Wakagaŵa nyanja pakati kuti iwo ŵambukepo, wakimika maji nga nchibumira.

¹⁴Na muhanya wakaŵarongozga na bingu, usiku wose wakaŵarongozga na ungweru wa moto.

¹⁵Wakapandura majarawe mu mapopa, na kuŵapa maji ghanandi nga ndi agho ghakufuma mu ndimba.

¹⁶Wakafumiska tumironga mu jarawe, ndipo maji wakaghayendeska nga ndi mironga.

¹⁷Ndipouli iwo ŵakarutilira kumunangira, na kumugarukira Chiuta Chikurukuru mu chiparamba mura.

¹⁸Ŵakamuyezga Chiuta mwa dala, pakumuchichizga kuti waŵape chakurya icho ŵakanwekeranga.

¹⁹Ŵakayowoya kususkana na Chiuta kuti, “Kasi Chiuta wangamanya kupereka vyakurya mu mapopa?

²⁰Wakatimba jarawe mwakuti maji ghakafuma fweche, tumironga tukazura. Kasi wangatipaso chakurya, panji kupereka nyama ku ŵanthu ŵakhe?”

²¹Ntheura, para FUMU yikakapulika, yikaphya mtima chomene, moto ukagolera pa Yakhobe, ukari wakhe ukiza pa Israele,

²²chifukwa ŵakawa na chipulikano mwa Chiuta chara, ŵakagomezga nkhongono yakhe yakuponoska chara.

²³Ndipouli, iyo wakalangula maŵingu mu mlengalenga, wakajula miryango ya kuchanya.

²⁴Wakaŵaroposkera mana kufumira kuchanya kuti ŵaryenge, wakaŵapa chingwa chakufuma kuchanya.

²⁵Ŵanthu ŵakarya chakurya cha ŵangelo, wakaŵatumira vyakurya vyakuzara.

²⁶Wakachitiska kuti mphepo ya ku mafumiro gha dazi yipute kuchanya. Ndipo yikarongozga mphepo ya ku mwera na nkhongono zakhe.

²⁷Wakaŵaroposkera nyama yinandi nga ndi fuvu, viyuni vinandi nga ndi muchenga wa ku nyanja.

²⁸Wakaviroposkera mukati mu misasa yawo, kulikose uko ŵakakharanga.

²⁹Ŵakarya na kukhuta, pakuti wakaŵapa ivyo ŵakanwekeranga.

³⁰Kweni pambere ŵandakhutiske kunweka kwawo, apo chakurya chikaŵa chichali mu milomo yawo,

³¹ukari wa Chiuta ukagolera pa iwo, wakakoma vinkhara vyawo vyose, ndipo wakamara. Wakamara ŵanyamata ŵakuzirwa mu Israele.

³²Ndipouli mu vyose ivi, ŵakarutilira kwananga ndipera, nangauli vyakuzizwiska ŵakaviwona, kuti ŵakapulikana nayo chara.

³³Ntheura wakadumula mazuŵa gha umoyo wawo, kuti ghamwalirikire nga ndi muvuchi, kuti virimika vyawo vimalire mu vinthu vyakofya.

³⁴Para wakakomanga ŵanyakhe, awo ŵakakhara wakamba kumupenja. Iwo ŵakang'anamuka mu mtima, na kumupenja Chiuta na phamphu.

³⁵Ŵakakumbuka kuti Chiuta ndiyo wakaŵa jarawe lawo, kuti Chiuta Chikurukuru ndiyo muwomboli wawo.

³⁶Kweni ŵakapusikizga waka na milomo yawo, ŵakateta kwa iyo na malulimi ghawo.

³⁷Iwo kuti ŵakaŵa ŵakugomezga kwa iyo chara, kuti ŵakasunga phangano lakhe chara.

³⁸Ndipouli pakuti Chiuta ngwa chiwuravi, wakaŵagowokera ubendezi wawo, ndipo wakaŵamara chara. Kaŵirikaŵiri wakawezgangako ukari wakhe, wakakhumbanga chara kufumiska ukari wakhe wose.

³⁹Wakakumbuka kuti iwo ŵakaŵa waka ŵanthu, mphepo iyo yikujumphapo waka kwambula kuweraso.

⁴⁰Kaŵirikaŵiri wakamugarukira mu mapopa, na kumuchitiska chitima mu chiparamba.

⁴¹Kaŵirikaŵiri ŵakamuyezga Chiuta, ŵakamwavya Mutuŵa Yura wa Israele.

⁴²Kuti ŵakakumbuka nkhongono yakhe chara, nesi zuŵa ilo wakaŵawombolera ku ŵarwani ŵawo,

⁴³para iyo wakachita vimanyikwiro vyakhe mu Eguputo, ndiposo na minthondwe mu chigaŵa cha Zowani.

⁴⁴Wakazgora mironga yawo kuŵa ndopa, mwakuti ŵakatondeka kumwamo maji mu mphandukira zakhe.

⁴⁵Wakaŵatumira milembwera ya zimembe izo zikaŵarumanga, na ŵachule awo ŵakaŵasokweska chomene.

⁴⁶Wakalangulira ŵakapuchi kurya mbewu zawo, na zombe kurya vipambi ivyo ŵakavitokatokeranga.

⁴⁷Wakamara mpheska zawo na matalala, makuni gha vikuyu na chiwuvi.

⁴⁸Wakalangula kuti ng'ombe zawo zifwe na matalala, ndipo miskambo yawo yikomeke na ŵaleza.

⁴⁹Wakafumiskira ukari wakhe wakofya pa iwo, kucheruka, kutukutwa mtima na mu visuzgo, ndiwo mpingo wa ŵangelo ŵakhe ŵakukoma.

⁵⁰Wakajula nthowa kurongora ukari wakhe, kuti wakaŵathaska ku nyifwa chara, kweni wakalangulira vilengo kuti viŵamare.

⁵¹Wakakoma ŵana wose ŵa uŵere mu Eguputo, ŵana ŵakudanga ŵankhongono zawo, mu mahema gha ŵa mphapu ya Hamu.

⁵²Pamanyuma wakafumiska ŵanthu ŵakhe nga ndi mberere, wakaŵarongozga mu mapopa nga ndi mskambo.

⁵³Wakaŵarongozga makora, mwakuti ŵakopa chara, kweni nyanja yikabizga ŵarwani ŵawo.

⁵⁴Wakiza nawo ku charu chakhe chakupatulika, ku phiri ilo woko lakhe lankhongono likapoka.

⁵⁵Wakachimbizga ŵamitundu panthazi pawo, wakaŵagaŵira charu chawo kuti chiharo cha ŵanthu ŵakhe, wakakhazika mafuko gha ŵaIsraele mu vikaya vyawo.

⁵⁶Ndipouli ŵakamuyezga na kumugarukira Chiuta Chikurukuru, iwo kuti ŵakasungilira vilayizgo vyakhe chara.

⁵⁷Kweni ŵakaŵa ŵachikana-marango, ŵakachita uryarya nga mbasekuru ŵawo, ŵakaŵa ŵakunyongoroka nga ndi uta wawakawaka.

⁵⁸Ŵakamukwiyiska pa malo ghawo gha pachanya ghakusoperako, ŵakamuwuskira sanje chifukwa cha vikozgo vyawo vyakuŵaja.

⁵⁹Para Chiuta wakapulika, wakakaripa chomene, wakaŵakanirathu ŵaIsraele.

⁶⁰Wakasida malo ghakhe ghakukharamo pa Shilo, hema ilo wakakharangamo pakati pa ŵanthu.

⁶¹Wakazomerezga kuti Bokosi la Phangano, lirute ku umikori, uchindami wakhe, kuruta ku ŵarwani ŵakhe.

⁶²Wakaŵapereka ŵanthu ŵakhe kuti ŵakomeke na lupanga, pakuti wakaŵa mukari chomene na iwo, chiharo chakhe.

⁶³Moto wa nkhondo ukakoma ŵanyamata ŵawo, ŵamwali ŵawo kuti ŵakatengwa chara.

⁶⁴Ŵasofi ŵawo ŵakakomeka na lupanga, vyokoro vyawo kuti vikatengera chara.

⁶⁵Penepapo FUMU yikachita nga ndi para yawuka mu tulo, nga ndi chinkhara icho chikuchemerezga para chaloŵera.

⁶⁶Yikaŵachimbizgira kumanyuma ŵarwani ŵakhe, yikaŵakhozga soni kwa muyirayira.

⁶⁷Yikajowola mahema gha Yosefe, kuti yikasankha fuko la Efurayimu chara.

⁶⁸Kweni yikasankha fuko la Yuda, Phiri la Ziyoni ilo yikutemwa.

⁶⁹Yikazenga malo ghakhe ghakupatulika, nga ndi malo ghakhe gha kuchanya, charu cha pasi icho wali kuchikhozga kwa muyirayira.

⁷⁰Chiuta wakasankha Davide, muteŵeti wakhe, ndipo wakaya kamutora ku vitupa vya mberere na mbuzi.

⁷¹Wakamutora uko wakaliskanga mberere izo zikaŵa na twana, kuti waŵe muliska wa Yakhobe, fuko lakhe, ŵaIsraele, chiharo chakhe.

⁷²Davide wakaŵapwererera na mtima wa urunji, wakaŵarongozga na woko lakhe mwa vinjeru.