Read new_tumbuka_bible MaSalimo 79 Bible Online

MaSalimo 79 - new_tumbuka_bible bible

MaSalimo 79

¹Salimo la Asafu. Mwe Chiuta, ŵamitundu ŵanjira mu chiharo chinu, ŵakazuzga nyumba yinu yakupatulika, ŵapasura msumba wa Yerusalemu.

²Vitanda vya ŵateŵeti ŵinu, ŵavipereka ku viyuni vya mudera kuŵa chakurya chawo. Mathupi gha ŵanthu ŵinu ŵakupatulika, ŵaghapereka ku vikoko vya ku thengere.

³Wathiska ndopa zawo mose mu Yerusalemu, nga ndi maji, ndipo kulije na yumoza wakuŵasunga.

⁴Tazgoka chinthu chakunyozeka ku ŵazengezgani ŵithu, chimuhoyere na chisunjizgo ku awo ŵatizingirizga.

⁵Kasi mpaka pauli, Mwe FUMU? Kasi muŵe ŵakukaripa kwa muyirayira? Kasi sanje yinu yigolerenge nga ndi moto, mpaka pauli?

⁶Pungulirani ukari winu pa ŵamitundu awo ŵakumumanyani chara, pa maufumu agho kuti ghakumusopani chara.

⁷Chifukwa ndigho ghamutwazura Yakhobe na kupasura malo ghakhe ghakukharamo.

⁸Mureke kutipa mrandu chifukwa cha kwananga kwa ŵasekuru ŵithu, mutichitire lusungu kwambula kuchedwa, pakuti tayuyurika chomene.

⁹Tovwirani, Mwe Chiuta, Muthaski withu, kuti zina linu liŵe lakuchindikika. Mutiponoske na kutigowokera zakwananga zithu, chifukwa cha zina linu.

¹⁰Chifukwa uli ŵamitundu ŵakuyowoya kuti, “Kasi Chiuta wawo wali nkhu?” Zomerezgani tiwone mukuwezgera nduzga pa ŵamitundu, chifukwa cha kuthiska ndopa za ŵateŵeti ŵinu.

¹¹Pulikani kutampha kwa awo ŵali mu gadi, kwizira mu nkhongono zinu zikuru, muŵasungilire awo ŵapimikira kuti ŵakomeke.

¹²Ŵazengezgani ŵithu, muŵawezgere nduzga kankhonde na kaŵiri, chifukwa cha misinjiro iyo ŵamuchitirani imwe, Mwe FUMU.

¹³Penepapo ise ta ŵanthu ŵinu, mberere za mu luhari lwinu, titi timuwongani imwe kwa muyirayira. Titi tipharazge za kurumba imwe, ku miwiro na miwiro.