Read new_tumbuka_bible MaSalimo 80 Bible Online

MaSalimo 80 - new_tumbuka_bible bible

MaSalimo 80

¹Kwa uyo wakwimbiska sumu: kwakuya na kimbiro ka sumu za Maluŵa. Ukaboni wa Asafu. Salimo. Tegherezgani khutu, mwe Muliska wa Israele, mwaŵeneimwe mukurongozga Yosefe, nga ndi mskambo wa mberere. Jingweruskani imwe mukukhara pa chizumbe, pakati pa ŵakerubi,

²panthazi pa Efurayimu, Benjamini na Manase. Wuskani nkhongono zinu, ndipo mwize katiponoske.

³Mutiwezgeremo, Mwe Chiuta. Chisko chinu chiŵare pa ise kuti tiponoskeke.

⁴Mwe FUMU, Chiuta Mwenenkhongono zose, kasi muti mukwiyire malurombo gha ŵanthu ŵinu mpaka pauli?

⁵Mwaŵaryeska chakurya cha masozi, mwaŵamweska masozi ghanandi chomene.

⁶Mwatizgora kuŵa ŵanthu ŵakuyuyurika na ŵazengezgani ŵithu, ndipo ŵarwani ŵithu ŵakutiseka.

⁷Mutiwezgeremo, Mwe Chiuta Mwenenkhongono zose, chisko chinu chiŵare pa ise kuti tiponoskeke.

⁸Mukiza na mpheska yinu kufuma ku Eguputo, mukachimbizga ŵamitundu na kupandamo mpheska yinu.

⁹Mukayisengulira malo kuti yimeremo, yikamera nkhorozi na kuzuzga charu.

¹⁰Mapiri ghakabenekerereka na mufwiri wakhe, ndipo milanje yikuru yikabenekerereka na minthavi yakhe.

¹¹Yikatandazgira minthavi yakhe ku nyanja yikuru, mphapukira za minthavi yakhe mpaka ku mronga.

¹²Kasi chifukwa uli mwapasula luŵigho lwakhe, mwakuti wose awo ŵakujumpha mu nthowa, ŵakuponthoramo vipambi vyakhe?

¹³Nguluŵe kufuma mu thengere zikuyinanga, vikoko vyose vya mu thondo vikuryamo.

¹⁴Mwe Chiuta Mwenenkhongono zose, zgokerani kwa ise. Laŵiskani pasi kufuma kuchanya uko, muwone. Pwerererani mpheska iyi,

¹⁵chisinkho icho mukapanda na woko linu la maryero, ndiposo na mtundu wa ŵanthu awo mukaŵalera kuŵa ŵinu.

¹⁶Mpheska yinu ŵadumulira pasi, wocha na moto, ŵalaŵiskani na ukari winu na kuŵamara petu.

¹⁷Kweni muŵe nawo awo mba ku woko linu la maryero, ŵanthu awo mukaŵalera kuŵa ŵinu.

¹⁸Ntheura kuti titi tiwukengeko kwa imwe chara. Tipani umoyo, ndipo titi tisopenge zina linu.

¹⁹Mutiwezgeremo, Mwe FUMU, Chiuta Mwenenkhongono zose, chisko chinu chiŵare pa ise kuti tiponoskeke.