Read new_tumbuka_bible MaSalimo 81 Bible Online

MaSalimo 81 - new_tumbuka_bible bible

MaSalimo 81

¹Kwa uyo wakwimbiska sumu: kwakuyana na kimbiro ka Gititi. Salimo la Asafu. Yimbani mwakuchemerezga kwa Chiuta, nkhongono yithu, chemerezgani na chimwemwe kwa Chiuta wa Yakhobe.

²Tumphuskani sumu, lizgani chimbitiku, bango wakunozga na chiding'indi.

³Lizgani mbata pa kuthwasa kwa mwezi, para mwezi ukuwoneka wa msuma, pa zuŵa la chiphikiro chithu.

⁴Chifukwa ili ndi dango la mu charu cha Israele, languro la Chiuta wa Yakhobe.

⁵Wakalimika kuŵa languro ku fuko la Yosefe, para ŵakafumanga mu charu cha Eguputo. Nkhupulika mazgu agho kuti nkhughamanya chara, ghakuti,

⁶“Nkhapepuska viŵegha vyinu, pakuwuskapo katundu, mawoko ghinu ghakaŵa ghanangwa ku vidunga vizitu.

⁷Mu visuzgo mukandichema, ndipo ine nkhamuthaskani, nkhamuzgorani uku ndabisama mu ŵaleza, nkhamuyezgani ku maji gha Meriba ghara.

⁸Pulikani imwe mwa ŵanthu ŵane, apo nkhumuchenjezgani. Imwe ŵaIsraele, mphanyi mwandipulikira waka.

⁹Mungaŵanga na chiuta wa chilendo mukati mwinu chara, mungalambiranga chiuta wa chilendo chara.

¹⁰Ine ndine FUMU, Chiuta winu, uyo wakamufumyani mu charu cha Eguputo. Yasamani mlomo winu, ndipo nditi ndimuryeskani.”

¹¹“Kweni ŵanthu ŵane kuti ŵakandipulikira chara, ŵaIsraele kuti ŵakandikhumba chara.

¹²Ntheura nkhaŵalegherezga ku unonono wa mitima yawo, kuti ŵarondezge makhumbiro ghawo.

¹³Mbaya mwe, ŵanthu ŵane mphanyi ŵandipulikira, mphanyi Israele wenda mu nthowa zane!

¹⁴Mphanyi mwaluŵiro nkhaŵathereska ŵarwani ŵawo, woko lane mphanyi likimikana na ŵarwani ŵawo.

¹⁵Awo ŵakutinkha FUMU, mphanyi ŵajilambika kwa iyo, soka lawo mphanyi yikakhalirira kwa muyirayira.

¹⁶Mphanyi ndamulerani na tirigu muweme chomene, mphanyi ndamukhutiskani na uchi wa mu jarawe.”