Read new_tumbuka_bible MaSalimo 83 Bible Online

MaSalimo 83 - new_tumbuka_bible bible

MaSalimo 83

¹Sumu. Salimo la Asafu. Mwe Chiuta, mungachetamanga waka chara, mungakharanga waka phee nesi kuŵa chisisi, Mwe Chiuta.

²Pakuti wonani, ŵarwani ŵinu ŵakuchita chivulupi, awo ŵakumutinkhani ŵali na mutafu.

³Mu uryarya, ŵakunozgera kwimikana na ŵanthu ŵinu, ŵakupangana kuŵachitira uheni awo mukuŵavikirira.

⁴Iwo ŵakuti, “Tiyeni tiŵasisite mwakuti ŵareke kuŵa fuko, kuti zina la Israele lireke kukumbukikaso.”

⁵Inya, ŵakupanga wupu na mtima umoza. Ŵakupangana kuti ŵimikane namwe.

⁶Aŵa ndiwo ŵaEdomu na ŵaIshimaele, ŵaMowabu na ŵaHagara,

⁷ŵaGebala, ŵaAmoni na ŵaAmaleki, ŵaFilisiti pamoza na awo ŵakukhara mu chigaŵa cha Ture.

⁸ŴaAsiriya nawo ŵakoreranako nawo. Iwo ndiwo woko lankhongono lakovwira ŵana ŵa Loti.

⁹Muchite nawo nga ndi umo mukachitira ku ŵaMidiyani, umo mukachitira kwa Sisera na Yabini pa mronga wa Kishoni,

¹⁰ŵeneawo ŵakakomekera ku Endoro, ndipo ŵakazgoka nga mbulongwe wa charu.

¹¹Ŵarongozgi ŵawo muŵachitire ivyo mukachitira Orebu na Zeyebu, ŵakaronga wawo wose muŵachitire nga ndi umo mukachitira na Zeba na Zalimuna,

¹²ŵeneawo ŵakati, “Tiyeni titore charu cha Chiuta kuti chiŵe chithu.”

¹³Mwe Chiuta wane, muŵazgore nga ndi fuvu la kavuruvuru, nga ndi mwerero uwo ukuputwa na mphepo,

¹⁴nga ndi umo moto ukochera thengere, panji umo moto wakulilima ukochera mapiri.

¹⁵Ntheura muŵazikizge na chimphupuru chinu, ndipo muŵawofye na kavuruvuru winu.

¹⁶Mwe FUMU, muŵakhozge soni, mwakuti ŵapenje zina linu.

¹⁷Ŵalengeskeke na kuchita wofi kwa muyirayira, ndipo ŵamare petu mwakukhozgeka soni.

¹⁸Iwo ŵamanye kuti imwe mwekha, mwaŵeneimwe zina linu ndi FUMU, ndimwe Chiuta Chikurukuru mu charu chose.