Read new_tumbuka_bible MaSalimo 84 Bible Online

MaSalimo 84 - new_tumbuka_bible bible

MaSalimo 84

¹Kwa uyo wakwimbiska sumu kwakuyana na kimbiro ka Gititi. Salimo la ŵana ŵa Kora. Malo agho mukukharamo, Mwe FUMU Mwenenkhongono zose, ngakutowa chomene.

²Mtima wane ukunweka, na kukhumbisiska kuti uwone mphara za FUMU. Mtima pamoza na thupi lane, vikwimba na chimwemwe kwa Chiuta wa moyo.

³Nanga ndi dunduru wakusanga malo ghakukharamo, nanga ndi kaŵeruŵeru nayo wali na chivimbo chakhe, umo wangagonekamo twana twakhe. Pa majochero ghinu, Mwe FUMU Mwenenkhongono zose, Karonga wane na Chiuta wane.

⁴Mbakutumbikika awo ŵakukhara mu nyumba yinu, awo ŵakumwimbirani sumu za kurumba imwe nyengo zose.

⁵Mbakutumbikika awo nkhongono zawo zikufumira kwa imwe, awo mu mitima yawo muli nthowa zakuruta ku Ziyoni.

⁶Apo ŵakwenda mu Chidika cha Baka, ŵakuchizgora kuŵa malo gha mbwiwi. Vura ya chizimyaluphya yikuchizuzga na viziŵa.

⁷Nkhongono zawo zikukulirakulira, Chiuta wa ŵachiuta wati wawoneke mu Ziyoni.

⁸Mwe FUMU, Chiuta Mwenenkhongono zose pulikani lurombo lwane, tegherezgani khutu, Mwe Chiuta wa Yakhobe

⁹Wonani, Mwe Chiuta, chiskango chithu, laŵiskani pa chisko cha ŵakuphakazgika ŵinu.

¹⁰Kukhara zuŵa limoza mu mphara zinu, nkhuweme, kuruska kukhara mazuŵa vikwi ku malo ghanji. Mphanyi ndanguŵa mulinda pa muryango wa Nyumba ya Chiuta wane, kuruska kukhara mu nyumba za ŵanthu ŵaheni.

¹¹Pakuti FUMU Chiuta ndi dazi na nguru. Yikupa uchizi na uchindami. Awo ŵakwenda mwakunyoroka, FUMU kuti yikuŵanora kanthu kaweme chara.

¹²Mwe FUMU Mwenenkhongono zose, ngwa kutumbikika munthu uyo wakugomezga mwa imwe.