Read new_tumbuka_bible MaSalimo 86 Bible Online

MaSalimo 86 - new_tumbuka_bible bible

MaSalimo 86

¹Lurombo lwa Davide. Tegherezgani khutu linu, Mwe FUMU, ndipo mundizgore, chifukwa ndine mukavu na musokwano.

²Sungani umoyo wane, pakuti ndine wakupulikira imwe, thaskani muteŵeti winu, uyo wakugomezga imwe. Imwe ndimwe Chiuta wane.

³Muŵe na lusungu na ine, mwe Fumu, pakuti zuŵa lose nkhulira kwa imwe.

⁴Kondweskani mtima wa muteŵeti winu, pakuti kwa imwe, Mwe FUMU, ndiko nkhwinuskira mtima wane.

⁵Pakuti imwe, Mwe FUMU, ndimwe muweme na wakugowokera, wakuzura na chisungusungu ku awo ŵakusopa zina linu.

⁶Mwe FUMU, tegherezgani khutu ku lurombo lwane, pulikizgani ku mazgu gha kuŵeya kwane.

⁷Mu zuŵa la suzgo yane, nkhumuchemani, pakuti mukuzgora malurombo ghane.

⁸Mwe FUMU, pa ŵachiuta palije na yumo ŵakuyana na imwe, nanga ndi milimo yinyakhe, yakuyana na ya imwe.

⁹Mafuko ghose gha ŵanthu agho muli kulenga ghamkwiza na kusindama panthazi pinu, Mwe FUMU, ndipo yizamkuchindika zina linu.

¹⁰Pakuti ndimwe ŵakuru, ndipo mukuchita vinthu vya minthondwe, imwe mwekha ndimwe Chiuta.

¹¹Ndisambizgani nthowa zinu, Mwe FUMU, ndipo nditi ndende mu unenesko winu. Mundipe mtima wambula kugaŵikana, mwakuti ndopenge zina linu.

¹²Mwe Fumu Chiuta wane, nditi ndimuwongani na mtima wane wose, ndipo nditi ndichindike zina linu kwa muyirayira.

¹³Pakuti chisungusungu chinu nchikuru kwa ine, imwe mwathaska umoyo wane, ku malo ghakuzongoka gha ŵanthu ŵakufwa.

¹⁴Ŵanthu ŵakujikuzga ŵandiwukira, Mwe Chiuta. Mzinda wa ŵanthu ŵankhaza, ukupenja kundikoma, ndipo kuti ŵakupwererako za imwe chara.

¹⁵Kweni imwe, Mwe FUMU, ndimwe Chiuta wa chiwuravi na wa uchizi, wakuziwurika kukaripa, wakuzura na chisungusungu na wakugomezgeka.

¹⁶Ng'anamukirani kwa ine ndipo mundilengere lusungu. Perekani nkhongono zinu kwa muteŵeti winu, ndipo muponoske mwana wa muteŵeti-kazi winu.

¹⁷Mundirongore chimanyikwiro cha kutemwa kwinu, mwakuti awo ŵakunditinkha ŵawone, na kukhozgeka soni, pakuti imwe, Mwe FUMU, mwandovwira na kundisanguruska.