Read new_tumbuka_bible MaSalimo 89 Bible Online

MaSalimo 89 - new_tumbuka_bible bible

MaSalimo 89

¹Sumu ya Etani wa mbumba Ezira. Mwe FUMU, nditi ndimbe vya chisungusungu chinu, kwa muyirayira, na mlomo wane, nditi ndipharazge kugomezgeka kwinu ku miwiro yose.

²Pakuti chisungusungu chinu chili kukhozgeka kwa muyirayira, kugomezgeka kwinu nkhwakukhozgeka, nga ndi mtambo kuchanya.

³Imwe mukati, “Ndachita phangano na wakusankhika wane, ndajirapizga kwa Davide muteŵeti wane kuti,

⁴‘Nditi ndikhozge mphapu yako kwa muyirayira, nditi ndimike chizumbe chako mu miwiro yose.’ ”

⁵Mitambo yikurumba minthondwe yinu, Mwe FUMU, yikurumbaso kugomezgeka kwinu, mu ungano wa ŵangelo.

⁶Pakuti kasi ndi njani kuchanya uyo wangalinganizgika na FUMU? Kasi ndi njani mu ŵana ŵa Chiuta uyo wakulingana na FUMU?

⁷Chiuta ndiyo ŵakopeka chomene mukati mu ungano wa ŵangelo, Iyo ndiyo mukuru na wa wakutenthemeska pa vyose ivyo vikumuzingirizga.

⁸Mwe FUMU, Chiuta Mwenenkhongono zose, kasi ndi njani uyo ngwa nkhongono nga ndimwe, Mwe FUMU, mwaŵeneimwe muli ŵakugomezgeka mu vyose?

⁹Imwe ndimwe mukuwusa nyanja yikari, para majigha ghawuka, mukukhariska bata ndimwe.

¹⁰Mukaphwanya Rahabu na kuŵa nga nchitanda. Mukambininiska ŵarwani ŵinu na woko linu lankhongono.

¹¹Mitambo njinu ndipo charu cha pasi nacho nchinu. Imwe muli kulenga charu na vyose ivyo vili mwenemumo.

¹²Imwe ndimwe mukalenga ku mpoto na ku mwera. Mapiri gha Taboro na Heremoni ghakusekerera na kurumba zina linu.

¹³Imwe muli na nkhongono zose. Woko linu ndankhongono, nadi, nkhongono zinu ndi za pachanya chomene.

¹⁴Urunji na weruzgi wakunyoroka, ndivyo lufura lwa chizumbe chinu. Chisungusungu na kugomezgeka vili panthazi pinu.

¹⁵Mbakutumbikika ŵanthu awo ŵakumanya sumu za kukondwa, awo ŵakwenda mu ungweru wa chisko chinu, Mwe FUMU.

¹⁶Iwo ŵakusekerera mu zina linu muhanya wose, ndipo ŵakurumba urunji winu.

¹⁷Pakuti ndimwe uchindami na nkhongono zawo, na kutemwa kwinu nkhongono zithu zikukwezgeka.

¹⁸Pakuti nguru yithu yikufumira kwa FUMU, karonga withu wakufumira kwa Mutuŵa Yura wa Israele.

¹⁹Kale mukayowoya mu mboniwoni, ku ŵanthu ŵinu ŵakugomezgeka kuti, “Ndaŵika mphumphu pa chinkhara, ndakwezga yumoza uyo wasankhika mukati mu ŵanthu.

²⁰Ndamusanga Davide, muteŵeti wane, ndamuphakazga mafuta ghane ghakupatulika.

²¹Mwakuti woko lane liŵenge pa iyo nyengo zose, nadi woko lane limukhozge.

²²Murwani kuti wamutonde chara, muheni kuti ŵati ŵamupepure chara.

²³Nditi ndiphwanye ŵarwani ŵakhe panthazi pakhe, na kuŵamara petu awo ŵakumutinkha.

²⁴Kugomezgeka na chisungusungu chane viŵenge na iyo, nkhongono zakhe zizamkukwezgeka mu zina lane.

²⁵Ndizamkutandazga nkhongono zakhe pa nyanja, woko lakhe la maryero pa mironga.

²⁶Iyo wandicheme kuti, ‘Imwe ndimwe Ŵadada, Chiuta wane, jarawe la chiponosko chane.’

²⁷Ndizamkumuzgora iyo kuŵa mwana wane wa uŵere. Wizamkuŵa mukuru nkhanira kuruska ŵakaronga ŵa mu charu cha pasi.

²⁸Chisungusungu chane chizamkuŵa pa iyo kwa muyirayira, ndipo phangano lane na iyo lamkukhalirira.

²⁹Ndizamkurutizga mphapu yakhe kwa muyirayira, ndipo chizumbe chakhe chamkukhalirira nga ndi mtambo.

³⁰“Kweni usange ŵana ŵakhe ŵakureka kupulikira dango lane, ndiposo ŵakureka kwenda mu vilayizgo vyane,

³¹usange ŵakuswa malangulo ghane, na kureka kusunga marango ghane,

³²ndizamkuŵalanga na ndodo chifukwa cha majuvyo ghawo, ndizamkuŵathyapula chifukwa cha ubendezi wawo.

³³Kweni kuti ndizamkuwuskapo chisungusungu chane pa iyo chara, nesi kuŵa wambula kugomezgeka kwa iyo.

³⁴Kuti ndizamkuswa phangano lane chara, nesi kusintha mazgu agho ndayowoya.

³⁵“Kamoza pera, ndarapira mu kupatulika kwane, kuti ndimupusike Davide chara.

³⁶Ŵa mphapu yakhe ŵizamkukhalirira kwa muyirayira, ndipo chizumbe chakhe nga ndi dazi panthazi pane.

³⁷Chizamkukhozgeka nga ndi mwezi kwa muyirayira, kaboni wane wakugomezgeka mu mtambo.”

³⁸Kweni sono mwamutaya na kumupata, mwamukwiyira wakuphakazgika winu.

³⁹Mwakana phangano linu na muteŵeti winu, mwakazuzga mphumphu yakhe pakuyitaya pa fuvu.

⁴⁰Mwabwangandula viliŵa vyakhe vyose, mwapankhura malinga ghakhe, ghazgoka mahami.

⁴¹Wose awo ŵakujumphapo ŵakumuskogha, wazgoka chimuhoyere cha ŵazengezgani ŵakhe.

⁴²Mwakuzga nkhongono za awo ŵakupindikana nayo, mwakondweska ŵarwani ŵakhe wose.

⁴³Nadi, mwabumphiska wuyi wa lupanga lwakhe, ndipo mulije kumuchinthiska mu nkhondo.

⁴⁴Mwawuskamo ndodo ya ufumu mu woko lakhe, mwawiskira pasi chizumbe chakhe.

⁴⁵Mwafupiska mazuŵa gha uwukirano wakhe, ndipo mwamukhozga soni.

⁴⁶Kasi mpaka pauli, Mwe FUMU? Kasi muti mujibise kwa muyirayira? Kasi ukari winu uti ugolere nga ndi moto mpaka pauli?

⁴⁷Kumbukani umo umoyo uliri ufupi, Mwe FUMU, kasi mwalengerachi ŵanthu wose kuŵa ŵawakawaka.

⁴⁸Kasi ndi munthu uli, uyo wangakhalirira wa moyo kwambula kufwa? Kasi ndi njani wangathaska umoyo wakhe, ku nkhongono za ku malo ŵanthu ŵakufwa?

⁴⁹Mwe FUMU, kasi chisungusungu chinu cha kale chili nkhu, icho mu kugomezgeka kwinu mukarapa kwa Davide?

⁵⁰Kumbukani, Mwe FUMU umo muteŵeti winu wasunjizgikira, umo nkhuzizipizgira misinjiro ya ŵanthu,

⁵¹yeneiyo ŵarwani ŵinu ŵakundisunjizga nayo, Mwe FUMU, na yeneiyo wakuhoyera mendero gha wa wakuphakazgika winu.

⁵²Yirumbike FUMU kwa muyirayira! Ameni! Ameni!