Read new_tumbuka_bible MaSalimo 9 Bible Online

MaSalimo 9 - new_tumbuka_bible bible

MaSalimo 9

¹Kwa uyo wakwimbiska sumu: kwakuyana na kayimbiro ka sumu yakuti, “Nyifwa ya Mwana”. Salimo la Davide. Na mtima wane wose, nditi ndimurumbani imwe, Mwe FUMU, ndipharenge milimo yinu yose yakuzizwiska.

²Nditi ndisekerere na kukondwera mwa imwe, nditi ndimbenge sumu zakurumba zina linu, mwe Chiuta Chikurukuru.

³Para ŵarwani ŵane ŵakuwerera nyuma, ŵakukhuŵara na kumara petu pa maso pinu.

⁴Imwe mwakhozgera kuti ndine wambula mrandu. Para mwakhara pa chizumbe chinu, kupereka weruzgi wakunyoroka.

⁵Mwachenya ŵamitundu, mwamara ŵakwananga, mwasisita mazina ghawo kwa muyirayira swii!

⁶Ŵarwani ŵamara kwa muyirayira nga ndi mahami, misumba yawo mwayibwangandula, ŵanthu kuti ŵayikumbukengeso chara.

⁷Kweni FUMU yikuwusa kwa muyirayira, yakhozga chizumbe chakhe kuti yeruzgenge.

⁸Iyo yikweruzga charu cha pasi mu urunji, yikweruzga ŵanthu kwambula kutemwera.

⁹FUMU ndi linga lakukhora kwa awo ŵakuyuzgika, linga lakukhora mu nyengo za visuzgo.

¹⁰Awo ŵakumanya zina linu, ŵakugomezga mwa imwe, pakuti imwe, Mwe FUMU, mukutaya chara, awo ŵakumupenjani.

¹¹Yimbani sumu zakurumba FUMU, iyo yikukhara mu Ziyoni. Pharazgani milimo yakhe, ku mitundu yose.

¹²Pakuti uyo wakuwezgera nduzga, awo ŵakuthiska ndopa, wakuŵakumbuka, kuti wakuruwa kulira kwa awo ŵakusuzgika chara.

¹³Mwe FUMU, mundilengere lusungu! Wonani umo nkhusuzgikira na awo ŵakunditinkha, imwe ndimwe mukundithaska ku nyifwa,

¹⁴kuti ndiphare marumbo ghinu ghose, na kukondwera pakuthaskika na imwe, mu vipata vya msumba wa Ziyoni.

¹⁵Ŵamitundu ŵabira mu mbuna iyo ŵakajima, malundi ghawo ghawira mu ukonde uwo ŵakabisa ŵekha.

¹⁶FUMU yajivumbula yekha, pakweruzga mwakunyoroka. Ŵakwananga ŵakuwira mu chipingo, icho ŵathya iwo ŵekha.

¹⁷Ŵakwananga ŵati ŵarute ku malo gha ŵakufwa, nanga ndi wose ŵamitundu awo ŵakuruwa Chiuta.

¹⁸Ŵakavu kuti ŵaruwikenge kwa muyirayira chara, chigomezgo cha ŵasokwano kuti chimarirengethu chara.

¹⁹Wukani, Mwe FUMU! Paŵavye munthu wakutonda, ŵamitundu ŵeruzgike panthazi pinu.

²⁰Muŵawofye, Mwe FUMU. Ŵamitundu ŵamanye kuti iwo ndi ŵanthu waka.