Read new_tumbuka_bible MaSalimo 90 Bible Online

MaSalimo 90 - new_tumbuka_bible bible

MaSalimo 90

¹Lurombo lwa Mozesi, munthu wa Chiuta. Mwe FUMU, ndimwe mwanguŵa malo ghithu ghakukharamo, mu miwiro na miwiro.

²Apo mapiri ghakaŵa ghachali ghandaŵeko, panji apo mukaŵa muchali mundachilenge charu chose, kufuma ku muyirayira mpaka ku muyirayira ndimwe Chiuta.

³Imwe mukuŵawezgera ŵanthu ku fuvu, ndipo mukuti, “Wererani ku fuvu, imwe mwa ŵanthu.”

⁴Pakuti virimika vikwi mu maso ghinu, vikuyana na zuŵa la mayiro ilo liri kujumpha, panji nga ndi kanyengo ka mu ulinda wa usiku.

⁵Imwe mukuphyerera ŵanthu kutali, ndipo ŵakuzgeŵerekera nga ndi maloto, panji nga ndi utheka uwo wasisipuka mulenje.

⁶Na mulenje ukutikitira na kukura, na mise ukufota na komira.

⁷Ise tikumara na ukari winu, tikutenthema na kukwiya kwinu.

⁸Mukuŵika maubendezi ghithu panthazi pinu, zakwananga zithu za ku udesi, zili pakweru panthazi pinu.

⁹Pakuti mazuŵa ghithu ghose ghakumara na ukari winu, virimika vinthu navyo vikumara luŵiro nga ndi muvuchi.

¹⁰Virimika vya umoyo withu ndi 70, panji usange tili na nkhongono vingakwana 80. Ndipouli umoyo wakhe wose ngwa kutokatoka na wa suzgo. Vikumara luŵiro, ndipera tikujirutira.

¹¹Kasi ndi njani wakumanya nkhongono za kukwiya kwinu, ndiposo na ukari winu uwo ukulingana na umo ŵanthu ŵakwenera kumoperani?

¹²Ntheura mutisambizge kupenda mazuŵa ghithu, mwakuti tiŵe na mahara.

¹³Mwe FUMU, gowokani! Kasi muti mukwiyenge mpaka pauli? Muŵe na lusungu pa ŵateŵeti ŵinu.

¹⁴Na mulenje mutikhutiske na chisungusungu chinu, mwakuti tikondwe na kusekerera mazuŵa ghithu ghose.

¹⁵Mutikondweske na mazuŵa ghanandi ghakuyana waka na agho mukatisuzgiranga, ghakuyana na virimika vinandi mu vyeneivyo tikawona viheni.

¹⁶Zomerezgani kuti milimo yinu yiwoneke ku ŵateŵeti ŵinu, nkhongono zinu za uchindami ziwoneke ku ŵana ŵawo.

¹⁷Imwe FUMU Chiuta withu, mutichitire lusungu, khozgani milimo ya mawoko ghithu, inya, khozgani milimo ya mawoko ghithu.