Read new_tumbuka_bible MaSalimo 91 Bible Online

MaSalimo 91 - new_tumbuka_bible bible

MaSalimo 91

¹Munthu uyo wakukhara mu Nyumba ya Chiuta Chikurukuru, wakupumula mu mufwiri wa Mwenenkhongono zose.

²Iyo wati wayowoye vya FUMU kuti, “Imwe ndimwe chiphokwero chane na linga lane. Ndimwe Chiuta wane, mwa uyo nkhugomezga.”

³Pakuti wati wakuthaske ku chipingo cha uyo wakuthya, ndiposo na ku nthenda iyo yikumara ŵanthu.

⁴Wati wakubenekerere na mahungwa ghakhe, ndipo kusi ku mapapindo ghakhe uti usange chiphokwero. Kugomezgeka kwakhe ndi nguru na chivikiriro.

⁵Kuti uŵenge na wofi na vyakofya vya usiku chara, nanga ndi muvwi wakuponyeka na muhanya,

⁶nanga ndi nthenda ya kukoma iyo yikuŵenda mu mdima, panji paranyiko ilo likuŵako na muhanya pakati.

⁷Ŵanthu 1,000 ŵangakomeka kuchiri kwako, 10,000 ŵangakomeka ku woko lako la maryero, kweni iwe kuti chikuchitikirenge chara.

⁸Iwe uti ulaŵiskenge waka na maso ghako, ndipo uwonenge umo ŵaheni ŵakulangikira.

⁹Chifukwa wayizgora FUMU kuŵa mphanji yako, Chiuta Chikurukuru kuŵa malo ghako ghakukharamo.

¹⁰Chiheni kuti chikuwirenge chara, chilengo nacho kuti chisendererenge kufupi na nyumba yako chara.

¹¹Pakuti wati walangulire ŵangelo ŵakhe na vya iwe, kukusungilira mu nthowa zako zose.

¹²Ŵati ŵakwankhe na mawoko ghawo, mzire ujibwaske lundi lako pa libwe.

¹³Uti ukandenge pa nkharamu na pa chipiri, uti ukandirizgenge pasi mwana wa nkharamu na njoka.

¹⁴Pakuti uyo wakunditemwa ine, nditi ndimuthaske, nditi ndimuvikirire chifukwa wakumanya zina lane.

¹⁵Para wakundichema, nditi ndimuzgore. Ndiŵenge nayo pa nyengo ya visuzgo, ndipo nditi ndimuthaske na kumuchindika.

¹⁶Nditi ndimukhutiske na umoyo utali, na kumurongora chiponosko chane.