Read new_tumbuka_bible MaSalimo 92 Bible Online

MaSalimo 92 - new_tumbuka_bible bible

MaSalimo 92

¹Salimo. Sumu ya pa Sabata. Nkhuweme kupereka viwongo kwa FUMU, na kwimbira marumbo zina linu, Mwe Chiuta Chikurukuru.

²Nkhuweme kupharazga chisungusungu chinu na mulenjelenje, na kugomezgeka kwinu na usiku,

³pa kwimba sumu na chiding'indi na bango, ndiposo na kukoŵerana kwa kalimba.

⁴Pakuti imwe, Mwe FUMU, mwandikondweska na milimo yinu. Chifukwa cha milimo ya mawoko ghinu, nkhwimba na chimwemwe.

⁵Mwe FUMU, nawo mbukuru wa milimo yinu! Maghanoghano ghinu nga kunyang'amira chomene.

⁶Munthu uyo nchindere wangamanya chara, mzereza nayo kuti wangapulikiska chara chinthu ichi,

⁷chakuti, nangauli ŵabendezi ŵakuphuka nga mbutheka, ndipo awo ŵakuchita uheni ŵakutikitira, umaliro wawo ndi nyifwa ya muyirayira.

⁸Kweni imwe, Mwe FUMU, ndimwe ŵapachanya kwa muyirayira.

⁹Nadi, ŵarwani ŵinu, Mwe FUMU, inya, ŵarwani ŵinu ŵati ŵamare. Wose awo ŵakuchita uheni ŵati ŵambininiskike.

¹⁰Kweni mwakuzga nkhongono nga ndi za njati, ndipo mwandiphakazga na mafuta ghaphya.

¹¹Maso ghane ghawona umo ŵarwani ŵane ŵatondekera, makutu ghane ghapulika umo ŵamalirenge ŵaheni awo ŵakundiwukira.

¹²Ŵarunji ŵati ŵatikitire nga ndi mukama, ŵati ŵakule nga ndi milanje mu Lebanoni.

¹³Ŵali kupandika mu Nyumba ya Chiuta, ŵakutikitira mu mphara za Chiuta withu.

¹⁴Ŵakupambika ndipera vipambi nanga ndi mu uchekuru wawo. Ŵali kuzura na mujwere ndiposo mbakubiriŵira,

¹⁵kurongora kuti FUMU njakunyoroka. Iyo ndiyo jarawe lane ndipo mwa iyo mulije ubendezi.